*
ಪ್ರಗತಿವಾಹಿನಿ ಸುದ್ದಿ, ಬೆಳಗಾವಿ
ನಗರದಲ್ಲಿ ಖೋಟಾ ನೋಟು ತಯಾರಿಸಲಾಗುತ್ತಿದೆ ಎಂಬ ಖಚಿತ ಮಾಹಿತಿ ಮೇರೆಗೆ ನಗರ ಪೊಲೀಸ್ ಅಧಿಕಾರಿಗಳ ನೇತೃತ್ವ ತಂಡ ದಾಳಿ ನಡೆಸಿ ಇಬ್ಬರನ್ನು ಬಂಧಿಸಿದೆ.
ನಗರ ಪೊಲೀಸ್ ಆಯುಕ್ತ ಡಿ.ಸಿ.ರಾಜಪ್ಪ ಪತ್ರಿಕಾಗೋಷ್ಠಿಯಲ್ಲಿ ಈ ಕುರಿತು ಮಾಹಿತಿ ನೀಡಿದರು.
ವಡಗಾವಿಯ ಆಶೀಫ್ ಶೇಖ, ಶ್ರೀನಗರದ ರಫೀಕ್ ದೇಸಾಯಿ ಬಂಧಿತರು. ಒಂದು ಕೋಟಿ 81 ಸಾವಿರ ರೂ. ವಶಪಡಿಸಿಕೊಳ್ಳಲಾಗಿದೆ. ಕಳೆದ ಆರು ತಿಂಗಳಿಂದ ಈ ದಂಧೆಯಲ್ಲಿ ತೊಡಗಿದ್ದಾರೆ. 2000 ಹಾಗೂ 500 ರೂ. ಮುಖಬೆಲೆಯ ನೋಟಗಳನ್ನು ತಯಾರಿಸುತ್ತಿದ್ದರು. ಆಶೀಫ್ ಶೇಖ ಎಂಬಾತನು ದುಬೈನಲ್ಲಿ ಖಾಸಗಿ ಕೆಲಸ ಮಾಡುತ್ತಾ ಖೋಟಾ ನೋಟು ತಯಾರಿಸುತ್ತಿದ್ದ.
ಬಂಧಿತರ ಬಳಿ ಇದ್ದ ಲ್ಯಾಪಟ್ಯಾಪ್, ಪ್ರಿಂಟರ್ ಸೇರಿದಂತೆ ನೋಟು ತಯಾರಿಸಲು ಬಳಸುತ್ತಿದ್ದ ವಸ್ತುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಒಂದು ಕೋಟಿ ರೂ.ಮೇಲ್ಪಟ್ಟ ಖೋಟಾ ನೋಟು ಇರುವುದರಿಂದ ಈ ಪ್ರಕರಣವನ್ನು ಸಿಐಡಿಗೆ ವರ್ಗಾವಣೆ ಮಾಡಲಾಗುವುದು ಎಂದರು.
ಡಿಸಿಪಿ ಸೀಮಾ ಲಾಟ್ಕರ್, ಎಸಿಪಿ ಭರಮನಿ ಉಪಸ್ಥಿತರಿದ್ದರು.
