*ಪ್ರತಿ ಶನಿವಾರ ಬ್ಯಾಂಕ್ ರಜೆ? ವೈರಲ್ ಆಗುತ್ತಿರುವ ಗೆಜೆಟ್ ಅಧಿಸೂಚನೆ ಸುಳ್ಳು!*

ಪ್ರಗತಿವಾಹಿನಿ ಸುದ್ದಿ: ಬೆಳಗಾವಿ: “ಪ್ರತಿ ಶನಿವಾರ ಎಲ್ಲಾ ಸರ್ಕಾರಿ ಬ್ಯಾಂಕ್‌ಗಳಿಗೆ ಸಾರ್ವಜನಿಕ ರಜೆ” ಎಂದು ಕೇಂದ್ರ ಸರ್ಕಾರದ ಗೆಜೆಟ್ ಹೆಸರಿನಲ್ಲಿ ವೈರಲ್ ಆಗುತ್ತಿರುವ ಪೋಟೋ ಸಂಪೂರ್ಣ ಸುಳ್ಳು ಎಂದು ಸಾಬೀತಾಗಿದೆ.

ವೈರಲ್ ಸುದ್ದಿ ಏನು?
ಸೆಪ್ಟೆಂಬರ್ 30, 2026 ರ ದಿನಾಂಕದ S.O. 4275(E) ನಂಬರಿನ ಭಾರತದ ರಾಜಪತ್ರ (Gazette of India) ಎಂದು ಹೇಳಿ, ಹಣಕಾಸು ಸಚಿವಾಲಯ ಪ್ರತಿ ಶನಿವಾರವನ್ನು ರಜೆ ಎಂದು ಘೋಷಿಸಿದೆ ಎಂಬ ಪೋಟೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ.

ನಿಜಾಂಶ ಏನು?

1. ಅಧಿಕೃತ ದಾಖಲೆ ಇಲ್ಲ: ಈ ನಂಬರಿನ ಯಾವುದೇ ಅಧಿಸೂಚನೆ ಕೇಂದ್ರದ Controller of Publications ಅಥವಾ RBI, DFS ವೆಬ್‌ಸೈಟ್‌ನಲ್ಲಿ ಪ್ರಕಟವಾಗಿಲ್ಲ.
2. ಸಚಿವಾಲಯದ ಸ್ಪಷ್ಟನೆ: ಹಣಕಾಸು ಸಚಿವಾಲಯದ ಮೂಲಗಳು ಈಗಾಗಲೇ ಸ್ಪಷ್ಟಪಡಿಸಿದ್ದು, “5 ದಿನಗಳ ವಾರದ ಬಗ್ಗೆ ಸರ್ಕಾರ ಎಂದಿಗೂ ಒಪ್ಪಿಕೊಂಡಿಲ್ಲ. ಇದು ಮಾತುಕತೆಯ ಅಂಶವೇ ಆಗಿರಲಿಲ್ಲ” ಎಂದು ಹೇಳಿವೆ.
3. ಬ್ಯಾಂಕ್ ನಿಯಮ ಯಥಾಸ್ಥಿತಿ: ಇಂದಿನವರೆಗೂ (ಅಕ್ಟೋಬರ್ 1, 2026) ಬ್ಯಾಂಕ್‌ಗಳು 2ನೇ ಮತ್ತು 4ನೇ ಶನಿವಾರ + ಎಲ್ಲಾ ಭಾನುವಾರ ಮಾತ್ರ ಮುಚ್ಚಿರುತ್ತವೆ. 1, 3 ಮತ್ತು 5ನೇ ಶನಿವಾರ ಕಡ್ಡಾಯವಾಗಿ ಕಾರ್ಯನಿರ್ವಹಿಸುತ್ತವೆ.
4. ಮುಷ್ಕರ ಮುಂದೂಡಿಕೆ: ಸೆಪ್ಟೆಂಬರ್ 28-30ಕ್ಕೆ ಕರೆ ನೀಡಿದ್ದ 3 ದಿನಗಳ ಮುಷ್ಕರವನ್ನು ಸೆಪ್ಟೆಂಬರ್ 27ರ ಸಂಧಾನ ಸಭೆ ಬಳಿಕ ಮುಂದೂಡಲಾಗಿದೆ. ಬೇಡಿಕೆ ಪರಿಶೀಲನೆಗೆ ಉನ್ನತ ಮಟ್ಟದ ಸಮಿತಿ ರಚನೆಯಾಗಿದೆ, ಹೊರತು ರಜೆ ಘೋಷಣೆಯಾಗಿಲ್ಲ.

ಆದ್ದರಿಂದ ಗ್ರಾಹಕರು ಗೊಂದಲಕ್ಕೀಡಾಗಬೇಡಿ. ಬ್ಯಾಂಕ್ ರಜೆಗಾಗಿ RBI ಅಧಿಕೃತ ಕ್ಯಾಲೆಂಡರ್ ಅನ್ನು ಮಾತ್ರ ನಂಬಿ.