ಹಿಂದೂಗಳ ಮೇಲೆ ದಾಳಿಗಳು ಹಿಂದೂ ಸಮಾಜವನ್ನು ನಿರ್ಮೂಲನೆ ಮಾಡಲು ಯೋಜಿತ ಪ್ರಯತ್ನ – ಅರುಣ್ ಕುಮಾರ್

ಪ್ರಗತಿವಾಹಿನಿ ಸುದ್ದಿ, ಧಾರವಾಡ : ಸಂಘದ ಕಾರ್ಯಕಾರಿ ಮಂಡಳಿಯ ಸಭೆಯಲ್ಲಿ ಬಾಂಗ್ಲಾದೇಶದಲ್ಲಿ ಹಿಂದೂಗಳ ಮೇಲಿನ ದಾಳಿಗೆ ಸಂಬಂಧಿಸಿದಂತೆ ನಿರ್ಣಯವನ್ನು ಅಂಗೀಕರಿಸಿದ್ದು, ಬಾಂಗ್ಲಾದೇಶದಲ್ಲಿ ಹಿಂದೂ ಸಮಾಜದ ಮೇಲೆ ನಡೆದ ದಾಳಿ ಹಠಾತ್ ಘಟನೆಯಲ್ಲ. ನಕಲಿ ಸುದ್ದಿಗಳ ಆಧಾರದ ಮೇಲೆ ಕೋಮು ಉನ್ಮಾದವನ್ನು ಸೃಷ್ಟಿಸಲು ಪ್ರಯತ್ನಿಸಲಾಯಿತು, ಇದು ಹಿಂದೂ ಸಮಾಜವನ್ನು ನಿರ್ಮೂಲನೆ ಮಾಡುವ ಯೋಜಿತ ಪ್ರಯತ್ನವಾಗಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸಹ ಸರಕಾರ್ಯವಾಹ ಅರುಣ್ ಕುಮಾರ್ ಹೇಳಿದರು.

ನಿರ್ಣಯವು ಹಿಂದೂಗಳ ಮೇಲಿನ ಹಿಂಸಾತ್ಮಕ ದಾಳಿಯ ಬಗ್ಗೆ ಸಂತಾಪ ವ್ಯಕ್ತಪಡಿಸಿದೆ ಮತ್ತು ಅಲ್ಲಿನ ಹಿಂದೂ ಅಲ್ಪಸಂಖ್ಯಾತರ ಮೇಲೆ ನಡೆಯುತ್ತಿರುವ ಕ್ರೂರ ಹಿಂಸಾಚಾರವನ್ನು ಮತ್ತು ಬಾಂಗ್ಲಾದೇಶದ ವ್ಯಾಪಕ ಇಸ್ಲಾಮೀಕರಣಕ್ಕಾಗಿ ಜಿಹಾದಿ ಸಂಘಟನೆಗಳ ಪಿತೂರಿಯನ್ನು ಬಲವಾಗಿ ಖಂಡಿಸುತ್ತದೆ ಎಂದು ಅವರು ಹೇಳಿದರು.

ಹಿಂದೂ ಸಮಾಜವನ್ನು ಗುರಿಯಾಗಿಸಿಕೊಂಡು ಪದೇ ಪದೇ ಹಿಂಸಾಚಾರದ ನಿಜವಾದ ಉದ್ದೇಶವು ಬಾಂಗ್ಲಾದೇಶದಿಂದ ಹಿಂದೂ ಸಮಾಜದ ಸಂಪೂರ್ಣ ನಿರ್ನಾಮ ಮಾಡುವುದೇ ಆಗಿದೆ. ಇದರ ಪರಿಣಾಮವಾಗಿ ಭಾರತದ ವಿಭಜನೆಯ ಸಮಯದಿಂದ ಹಿಂದೂ ಸಮಾಜದ ಜನಸಂಖ್ಯೆಯು ನಿರಂತರವಾಗಿ ಕಡಿಮೆಯಾಗುತ್ತಿದೆ. ವಿಭಜನೆಯ ಸಮಯದಲ್ಲಿ, ಪೂರ್ವ ಬಂಗಾಳದಲ್ಲಿ ಹಿಂದೂಗಳ ಜನಸಂಖ್ಯೆಯು ಸುಮಾರು ಇಪ್ಪತ್ತೆಂಟು ಪ್ರತಿಶತದಷ್ಟು ಇತ್ತು, ಅದು ಈಗ ಸುಮಾರು ಎಂಟಕ್ಕೆ ಇಳಿದಿದೆ. ಜಮಾತ್-ಎ-ಇಸ್ಲಾಮಿ (ಬಾಂಗ್ಲಾದೇಶ) ದಂತಹ ತೀವ್ರಗಾಮಿ ಇಸ್ಲಾಮಿಸ್ಟ್ ಗುಂಪುಗಳ ದುಷ್ಕೃತ್ಯಗಳಿಂದಾಗಿ ವಿಭಜನೆಯ ಅವಧಿಯಿಂದ ವಿಶೇಷವಾಗಿ 1971 ರ ಯುದ್ಧದ ಸಮಯದಲ್ಲಿ ಹೆಚ್ಚಿನ ಸಂಖ್ಯೆಯ ಹಿಂದೂ ಸಮಾಜಗಳು ಭಾರತಕ್ಕೆ ವಲಸೆ ಹೋಗಬೇಕಾಯಿತು ಎಂದು ನಿರ್ಣಯದಲ್ಲಿ ಹೇಳಲಾಗಿದೆ.

ಸಂಘವು ಮಾನವ ಹಕ್ಕುಗಳ ತಥಾಕಥಿತ ಕಾವಲು ಸಂಸ್ಥೆಗಳು ಮತ್ತು ಸಂಯುಕ್ತ ರಾಷ್ಟ್ರ ಸಂಸ್ಥೆಗಳ ಆಳವಾದ ಮೌನದ ಬಗ್ಗೆ ಕಳವಳ ವ್ಯಕ್ತಪಡಿಸಿತು ಮತ್ತು ಹಿಂಸಾಚಾರವನ್ನು ಖಂಡಿಸಲು ಮತ್ತು ಬಾಂಗ್ಲಾದೇಶದ ಹಿಂದೂ, ಬೌದ್ಧ ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳ ರಕ್ಷಣೆ ಹಾಗೂ ಸುರಕ್ಷೆಗಾಗಿ ಅಂತರರಾಷ್ಟ್ರೀಯ ಸಮುದಾಯಕ್ಕೆ ಕರೆ ನೀಡಿತು. ಬಾಂಗ್ಲಾದೇಶ ಅಥವಾ ಪ್ರಪಂಚದ ಯಾವುದೇ ಭಾಗದಲ್ಲಿ ಮೂಲಭೂತವಾದ ಇಸ್ಲಾಮಿಕ್ ಶಕ್ತಿಯ ಹೊರಹೊಮ್ಮುವಿಕೆಯು ವಿಶ್ವದ ಶಾಂತಿಪ್ರಿಯ ದೇಶಗಳ ಪ್ರಜಾಪ್ರಭುತ್ವ ವ್ಯವಸ್ಥೆ ಮತ್ತು ಮಾನವ ಹಕ್ಕುಗಳಿಗೆ ಗಂಭೀರ ಬೆದರಿಕೆಯಾಗಿದೆ ಎಂದು ಸಾಬೀತುಪಡಿಸುತ್ತದೆ.

ನಿರ್ಣಯದಲ್ಲಿ, ಹಿಂಸಾಚಾರದಲ್ಲಿ ಸಂತ್ರಸ್ತರ ಕುಟುಂಬಗಳಿಗೆ ಸಹಾಯ ಮಾಡಿದ್ದಕ್ಕಾಗಿ ಇಸ್ಕಾನ್, ರಾಮಕೃಷ್ಣ ಮಿಷನ್, ಭಾರತ ಸೇವಾಶ್ರಮ ಸಂಘ, ವಿಶ್ವ ಹಿಂದೂ ಪರಿಷತ್ ಮತ್ತು ಅನೇಕ ಹಿಂದೂ ಸಂಘಟನೆಗಳು ಮತ್ತು ಸಂಸ್ಥೆಗಳನ್ನು ಶ್ಲಾಘಿಸಲಾಗಿದೆ. ಬಾಂಗ್ಲಾದೇಶದಲ್ಲಿ ನಡೆಯುತ್ತಿರುವ ಆಕ್ರಮಣಗಳು ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆಗಳ ಬಗ್ಗೆ ವಿಶ್ವದಾದ್ಯಂತ ಹಿಂದೂ ಸಮಾಜ ಮತ್ತು ಸಂಸ್ಥೆಗಳ ಕಳವಳಗಳನ್ನು ಲಭ್ಯವಿರುವ ಎಲ್ಲಾ ರಾಜತಾಂತ್ರಿಕ ಮಾರ್ಗಗಳನ್ನು ಬಳಸಿಕೊಂಡು ಬಾಂಗ್ಲಾದೇಶ ಸರ್ಕಾರಕ್ಕೆ ತಿಳಿಸಲು ಮೂಲಕ ಹಿಂದೂ ಮತ್ತು ಬೌದ್ಧ ಸಮಾಜದ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಕಾರ್ಯಕಾರಿ ಮಂಡಳಿಯು ಭಾರತ ಸರ್ಕಾರವನ್ನು ವಿನಂತಿಸಿದೆ.

ಸಂಘದ ಅಖಿಲ ಭಾರತೀಯ ಪ್ರತಿನಿಧಿ ಸಭೆಯು ಸಂಘದ ಅತ್ಯುನ್ನತ ನಿರ್ಣಯ ಮಾಡುವ ಸಂಸ್ಥೆ ಪ್ರತಿನಿಧಿ ಸಭೆಯಾಗಿದ್ದು,  ವರ್ಷಕ್ಕೊಮ್ಮೆ ಮಾರ್ಚ್‌ನಲ್ಲಿ ಸಭೆ ಸೇರುತ್ತದೆ. ಅಂತೆಯೇ ಎರಡನೇ ಸಾಂವಿಧಾನಿಕ ಸಂಸ್ಥೆಯು ಕಾರ್ಯಕಾರಿ ಮಂಡಳಿಯಾಗಿದೆ, ಅದರ ಸಭೆ ಇಲ್ಲಿ ನಡೆಯುತ್ತಿದೆ. ಮಾರ್ಚ್‌ನಲ್ಲಿ ನಡೆಯಲಿರುವ ಪ್ರತಿನಿಧಿ ಸಭೆಯಲ್ಲಿ ವಾರ್ಷಿಕ ಯೋಜನೆಯನ್ನು ರೂಪಿಸಲಾಗುತ್ತದೆ ಹಾಗೂ ಅ.ಭಾ. ಅಧಿಕಾರಿಗಳ ಪ್ರವಾಸದ ಯೋಜನೆಯನ್ನು ಕೂಡ ನಿರ್ಧರಿಸಲಾಗುತ್ತದೆ. ವರ್ಷದಲ್ಲಿ ಇದುವರೆಗೆ ನಡೆದ ಕಾರ್ಯದ ಸಮೀಕ್ಷೆ  ಕೂಡ ಈ ಅಕ್ಟೋಬರ್ ಸಭೆಯ ಪ್ರಮುಖ ಕಾರ್ಯವಾಗಿದೆ.

ಶ್ರೀರಾಮ ಜನ್ಮಭೂಮಿ ನಿಧಿ ಸಮರ್ಪಣ ಅಭಿಯಾನದಲ್ಲಿ  ಕೇವಲ ಹಣ ಸಂಗ್ರಹಿಸುವುದು ಸಂಘದ ಮುಖ್ಯ ಉದ್ದೇಶವಾಗಿರಲಿಲ್ಲ.  ಜನ್ಮಭೂಮಿ ಟ್ರಸ್ಟ್ ಕರೆಗೆ ಸಮಾಜದ ಜನ ಧನ ನೀಡಿದ್ದಾರೆ. ಈ ಆಂದೋಲನದಲ್ಲಿ ಇಡೀ ಸಮಾಜದ ಪಾಲ್ಗೊಳ್ಳುವಿಕೆ ಇದೆ ಎಂದು ಸಂಘವು ನಂಬಿದೆ, ಆದ್ದರಿಂದ ಸಮಾಜದಲ್ಲಿನ ಹೆಚ್ಚೆಚ್ಚು ಜನರನ್ನು ತಲುಪುವ ಗುರಿಯನ್ನು ನಿಗದಿಪಡಿಸಲಾಗಿತ್ತು.  ದೇಶದ 6.5 ಲಕ್ಷ (ಅಂದಾಜು ಅಂಕಿ) ಹಳ್ಳಿಗಳ ಪೈಕಿ ಸಂಘದ ಕಾರ್ಯಕರ್ತರು 5.34 ಲಕ್ಷ ಹಳ್ಳಿಗಳನ್ನು ತಲುಪಿದರು, ಎಲ್ಲಾ ನಗರಗಳಲ್ಲಿನ ಎಲ್ಲಾ ವಸಾಹತುಗಳನ್ನು ತಲುಪಿದರು. ಅಭಿಯಾನದಲ್ಲಿ ಕಾರ್ಯಕರ್ತರು 12.73 ಕೋಟಿ ಕುಟುಂಬಗಳನ್ನು ತಲುಪಿದ್ದಾರೆ. ಕೇವಲ ಸಂಘದ ಕಾರ್ಯಕರ್ತರು ಮಾತ್ರವಲ್ಲ, ಸಮಾಜದಲ್ಲಿನ ಅನೇಕರು ಸ್ವಯಂ ಪ್ರೇರಣೆಯಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಈ ಅಭಿಯಾನದಲ್ಲಿ ಸೇರಿಕೊಂಡರು. 25 ರಿಂದ 30 ಲಕ್ಷ ಮಹಿಳಾ ಮತ್ತು ಪುರುಷ ಕಾರ್ಯಕರ್ತರು ಈ ಅಭಿಯಾನದಲ್ಲಿ ಭಾಗವಹಿಸಿದ್ದರು.

ಅಂತೆಯೇ, ಕರೋನಾ ಸಮಯದಲ್ಲಿ, ಸವಾಲು ಕೂಡ ದೊಡ್ಡದಾಗಿತ್ತು, ಮತ್ತು ಸಮಾಜದಿಂದ ಪ್ರತಿಕ್ರಿಯೆ ಕೂಡ ಸಮಗ್ರವಾಗಿತ್ತು. ಎಲ್ಲರೂ ಒಟ್ಟಿಗೆ ಕೆಲಸ ಮಾಡಿದರು, ಅನೇಕ ಹೊಸ ಜನರು ನಮ್ಮೊಂದಿಗೆ ಸೇರಿಕೊಂಡರು ಮತ್ತು ನಮ್ಮೊಂದಿಗೆ ಕೆಲಸ ಮಾಡಲು ಬಯಸಿದ್ದರು. ಅಂತಹವರನ್ನು ನಮ್ಮ ಕಾರ್ಯದೊಂದಿಗೆ ಜೋಡಿಸಿಕೊಳ್ಳಲು ಮಾರ್ಚ ತಿಂಗಳ ಸಭೆಯಲ್ಲಿ ವಿಚಾರ ಮಾಡಲಾಗಿತ್ತು. ಈಗಿನ ಸಭೆಯಲ್ಲಿ ಈ ವಿಷಯವಾಗಿ ಕಾರ್ಯ ವಿಸ್ತಾರದ ಬಗ್ಗೆಯೂ ಕೂಡ ಪರಿಶೀಲನೆ ನಡೆಸಲಾಯಿತು.

ಮಾರ್ಚ್ ತಿಂಗಳ ಸಭೆಯಲ್ಲಿ ಈ ಎಲ್ಲ ಜನರನ್ನು ಪರಿಸರ ಸಂರಕ್ಷಣೆ, ಕುಟುಂಬ ಪ್ರಭೋಧನ, ಸಾಮರಸ್ಯ , ಸಮಾಜಿಕ ಸದ್ಭಾವದ ಕಾರ್ಯದ ಜೊತೆಗೆ ಜೋಡಿಸಲು ಚಿಂತನೆ ಮಾಡಲಾಗಿತ್ತು. ಈ ನಾಲ್ಕು ಗತಿವಿಧಿಗಳು ಸಮಾಜದ ಚಟುವಟಿಕೆಗಳನ್ನಾಗಿಸುವ ದೃಷ್ಟಿಯಿಂದ ಕಾರ್ಯ  ಮಾಡಲು ನಿರ್ಧರಿಸಲಾಯಿತು. ಈವರೆಗೆ ಮಾಡಿದ ಪ್ರಯತ್ನಗಳು ಮತ್ತು ಅನುಭವಗಳ ಕುರಿತು ಸಭೆಯಲ್ಲಿ ಪರಿಶೀಲನೆ ಮಾಡಲಾಯಿತು. ಇದರೊಂದಿಗೆ ದೇಶವು 75ನೇ ಸ್ವಾತಂತ್ರ್ಯೋತ್ಸವದ ಸಂಭ್ರಮದಲ್ಲಿದೆ. ಸ್ವಾತಂತ್ರ್ಯದ ಅಮೃತ ಮಹೋತ್ಸವ ಸಂದರ್ಭದಲ್ಲಿ  ಏನು ಮಾಡಬಹುದು, ಏನು ಮಾಡಬೇಕು ಎಂಬುದನ್ನೂ ಸಭೆಯಲ್ಲಿ ಚರ್ಚಿಸಲಾಗಿದೆ ಎಂದು ಸಹ ಸರಕಾರ್ಯವಾಹರು ತಿಳಿಸಿದರು.