*ಸಲ್ಮಾನ್ ಖಾನ್ ಬಳಿಕ ಇತರ ನಟರ ಮೇಲೂ ಕಣ್ಣು*: *ಬಿಷ್ಣೋಯ್ ಗ್ಯಾಂಗ್ ಸಂಚು ಬಯಲು*

ಪ್ರಗತಿವಾಹಿನಿ ಸುದ್ದಿ: ಬಾಲಿವುಡ್ ನಟ ಸಲ್ಮಾನ್ ಖಾನ್‌ಗೆ ನಿರಂತರ ಬೆದರಿಕೆ ಹಾಕುತ್ತಿರುವ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್, ಇತರ ಸಿನಿಮಾ ತಾರೆಯರ ನಿವಾಸಗಳನ್ನೂ ಗುರಿಯಾಗಿಸಲು ಸಂಚು ರೂಪಿಸಿತ್ತು ಎಂಬ ಮಾಹಿತಿ ಮುಂಬೈ ಪೊಲೀಸರ ತನಿಖೆಯಲ್ಲಿ ಬಹಿರಂಗವಾಗಿದೆ. ಸಂಜಯ್ ದತ್, ಆಮಿರ್ ಖಾನ್, ಇಮ್ರಾನ್ ಹಶ್ಮಿ ಹಾಗೂ ಟೈಗರ್ ಶ್ರಾಫ್ ನಿವಾಸಗಳ ಸುತ್ತ ಗ್ಯಾಂಗ್‌ನ ಶೂಟರ್‌ಗಳು ಮಾಹಿತಿ ಸಂಗ್ರಹಿಸಲು ಪ್ರಯತ್ನಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ತನಿಖೆಯ ಪ್ರಕಾರ, ಹರಿಯಾಣದ ಸೋನಿಪತ್ ಮೂಲದ ಶೂಟರ್‌ಗಳಾದ ರೆಹಾನ್ ಮತ್ತು ಫೂಲ್ ಸಿಂಗ್ ಸೆಪ್ಟೆಂಬರ್ ಕೊನೆಯ ವಾರದಲ್ಲಿ ಅಕ್ರಮ ಪಿಸ್ತೂಲ್‌ನೊಂದಿಗೆ ಮುಂಬೈಗೆ ಬಂದಿದ್ದರು. ಬಿಷ್ಣೋಯ್ ಗ್ಯಾಂಗ್‌ನ ಪ್ರಮುಖ ಸಂಚುಕೋರ ಅನಿಲ್ ಪಂಡಿತ್ ಸೂಚನೆಯಂತೆ ಇಬ್ಬರೂ ಸಲ್ಮಾನ್ ಖಾನ್ ವಾಸಿಸುವ ಗ್ಯಾಲಕ್ಸಿ ಅಪಾರ್ಟ್‌ಮೆಂಟ್ ಬಳಿ ತೆರಳಿದ್ದರು. ಆದರೆ, ಅಲ್ಲಿ ಬಿಗಿ ಪೊಲೀಸ್ ಭದ್ರತೆ ಇದ್ದ ಕಾರಣ ನೇರ ದಾಳಿ ನಡೆಸುವುದು ಕಷ್ಟ ಎಂದು ಹ್ಯಾಂಡ್ಲರ್‌ಗೆ ಮಾಹಿತಿ ನೀಡಿದ್ದರು ಎನ್ನಲಾಗಿದೆ.

ಸಲ್ಮಾನ್ ಖಾನ್ ನಿವಾಸದ ಬಳಿ ದಾಳಿ ನಡೆಸಲು ಸಾಧ್ಯವಾಗದ ಹಿನ್ನೆಲೆಯಲ್ಲಿ, ಬಾಲಿವುಡ್‌ನ ಇತರ ನಟರ ಮನೆಗಳ ವಿಡಿಯೋಗಳನ್ನು ಚಿತ್ರೀಕರಿಸಿ ಕಳುಹಿಸುವಂತೆ ಅನಿಲ್ ಪಂಡಿತ್ ಸೂಚಿಸಿದ್ದನು ಎಂದು ಪೊಲೀಸರು ತಿಳಿಸಿದ್ದಾರೆ. ಬಳಿಕ ಶೂಟರ್‌ಗಳು 400 ರೂಪಾಯಿ ಬಾಡಿಗೆ ನೀಡಿ ಆಟೋರಿಕ್ಷಾದಲ್ಲಿ ಆಮಿರ್ ಖಾನ್, ಇಮ್ರಾನ್ ಹಶ್ಮಿ ಹಾಗೂ ಸಂಜಯ್ ದತ್ ನಿವಾಸಗಳ ಬಳಿ ತೆರಳಿದ್ದರು. ಸಲ್ಮಾನ್ ಖಾನ್‌ಗೆ ದೀರ್ಘಕಾಲದ ಆಪ್ತರಾಗಿರುವ ಸಂಜಯ್ ದತ್ ಅವರನ್ನು ಪರ್ಯಾಯ ಗುರಿಯಾಗಿ ಆಯ್ಕೆ ಮಾಡುವ ಬಗ್ಗೆಯೂ ಗ್ಯಾಂಗ್ ಯೋಜಿಸಿತ್ತು ಎಂದು ತನಿಖೆಯ ವಿವರಗಳು ಸೂಚಿಸುತ್ತವೆ.

ಮುಂಬೈನ ಪಾಲಿ ಹಿಲ್‌ನಲ್ಲಿರುವ ಸಂಜಯ್ ದತ್ ನಿವಾಸದ ಬಳಿ ತೆರಳಿದ ಶೂಟರ್‌ಗಳು, ಸ್ಥಳೀಯರನ್ನು ಸಂಪರ್ಕಿಸಿ ‘ಸಂಜಯ್ ಬಾಬಾ ಮನೆಯಲ್ಲಿದ್ದಾರಾ?’ ಎಂದು ವಿಚಾರಿಸಿದ್ದರು ಎನ್ನಲಾಗಿದೆ. ದತ್ ಯಾವ ಫ್ಲಾಟ್‌ನಲ್ಲಿ ವಾಸಿಸುತ್ತಾರೆ ಮತ್ತು ಯಾವ ಕಾರು ಬಳಸುತ್ತಾರೆ ಎಂಬುದನ್ನು ತಿಳಿದುಕೊಳ್ಳಲು ಇನ್‌ಸ್ಟಾಗ್ರಾಮ್ ರೀಲ್ಸ್ ಹಾಗೂ ಯೂಟ್ಯೂಬ್ ವಿಡಿಯೋಗಳನ್ನೂ ಪರಿಶೀಲಿಸಿದ್ದರು. ಪಾರ್ಕಿಂಗ್‌ನಲ್ಲಿದ್ದ ಕಾರುಗಳನ್ನು ಹೋಲಿಸಿ ಮಾಹಿತಿ ಪತ್ತೆಹಚ್ಚಲು ಪ್ರಯತ್ನಿಸಿದ್ದರು. ಆದರೆ, ನಿವಾಸದ ಬಳಿ ದೊಡ್ಡ ಮರಗಳು ಇದ್ದ ಕಾರಣ ನಿಖರ ಮಾಹಿತಿ ಸಿಗಲಿಲ್ಲ ಎಂದು ವರದಿಯಾಗಿದೆ.

ಸಂಜಯ್ ದತ್ ಬಗ್ಗೆ ನಿಖರ ಮಾಹಿತಿ ಲಭ್ಯವಾಗದ ಹಿನ್ನೆಲೆಯಲ್ಲಿ, ಟೈಗರ್ ಶ್ರಾಫ್ ಮೇಲೆ ಗಮನಹರಿಸುವಂತೆ ಅನಿಲ್ ಪಂಡಿತ್ ಸೂಚಿಸಿದ್ದನು ಎಂದು ಪೊಲೀಸರು ತಿಳಿಸಿದ್ದಾರೆ. ಟೈಗರ್ ಶ್ರಾಫ್ ಪ್ರತಿ ಭಾನುವಾರ ಜುಹುವಿನ ಪುಷ್ಪಾ ಪಾರ್ಕ್ ಸಮೀಪದ ಶಾಲಾ ಮೈದಾನದಲ್ಲಿ ಫುಟ್ಬಾಲ್ ಆಡಲು ಬರುತ್ತಾರೆ ಮತ್ತು ಅಲ್ಲಿ ಹೆಚ್ಚಿನ ಅಧಿಕೃತ ಪೊಲೀಸ್ ಭದ್ರತೆ ಇರುವುದಿಲ್ಲ ಎಂಬ ಮಾಹಿತಿ ಶೂಟರ್‌ಗಳಿಗೆ ನೀಡಲಾಗಿತ್ತು ಎನ್ನಲಾಗಿದೆ. ಈ ಮಾಹಿತಿಯ ಆಧಾರದಲ್ಲಿ ದಾಳಿ ನಡೆಸಲು ಯೋಜನೆ ರೂಪಿಸಲಾಗಿತ್ತು ಎಂಬುದು ತನಿಖೆಯಲ್ಲಿ ತಿಳಿದುಬಂದಿದೆ.