ಪಾಲಿಕೆ ಅಧಿಕಾರಿಗಳಿಂದ ಟ್ರೇಡ್ ಲೈಸನ್ಸ್ ಗೆ ಒತ್ತಡ: ಚೆಂಬರ್ ಆಫ್ ಕಾಮರ್ಸ್ ದೂರು

ಎಲ್ಲಾ ವ್ಯಾಪಾರಿಗಳಿಗೆ ಟ್ರೇಡ್ ಲೈಸನ್ಸ್ ಅನ್ವಯಿಸುವುದಿಲ್ಲ

ಪ್ರಗತಿವಾಹಿನಿ ಸುದ್ದಿ, ಬೆಳಗಾವಿ – ಬೆಳಗಾವಿ ಚೇಂಬರ್ ಆಫ್ ಕಾಮರ್ಸ್ & ಇಂಡಸ್ಟ್ರೀಸ್ ನಿಯೋಗ ಟ್ರೇಡ್ ಲೈಸೆನ್ಸ್ ಮತ್ತು ಟ್ರೇಡ್ ಲೈಸೆನ್ಸ್ ನವೀಕರಣದ ಕುರಿತು ಪಾಲಿಕೆ ಅಧಿಕಾರಿಗಳಿಂದ ಆಗುತ್ತಿರುವ ಕಿರುಕುಳ ಕುರಿತು ಬೆಳಗಾವಿ ಮಹಾನಗರ ಪಾಲಿಕೆ ಆಯುಕ್ತರನ್ನು ಭೇಟಿಯಾಗಿ ದೂರು ಸಲ್ಲಿಸಿತು.

ಬೆಳಗಾವಿ ಮಹಾನಗರ ಪಾಲಿಕೆ ಅಧಿಕಾರಿಗಳು ಎಲ್ಲಾ ವರ್ತಕರಿಗೆ ಟ್ರೇಡ್ ಲೈಸೆನ್ಸ್ ತೆಗೆದುಕೊಳ್ಳುವಂತೆ ಒತ್ತಾಯಿಸುತ್ತಿರುವ ಬಗ್ಗೆ ಬೆಳಗಾವಿ ಚೇಂಬರ್ ಆಫ್ ಕಾಮರ್ಸ್ ಮತ್ತು ಇಂಡಸ್ಟ್ರೀಸ್‌ಗೆ ವ್ಯಾಪಾರ ವಲಯದಿಂದ ಹಲವಾರು ದೂರುಗಳು ಬಂದಿವೆ.

ಆದರೆ, ಕೆಎಂಎ 1977 ರ ಪ್ರಕಾರ ಎಲ್ಲಾ ವ್ಯಾಪಾರಿಗಳಿಗೆ ಟ್ರೇಡ್ ಲೈಸನ್ಸ್ ಅನ್ವಯಿಸುವುದಿಲ್ಲ. ವ್ಯಾಪಾರ ಪರವಾನಗಿಯನ್ನು ಪಡೆಯಬೇಕಾದ ವ್ಯಾಪಾರಗಳ ಪಟ್ಟಿಯನ್ನು ಸ್ಪಷ್ಟವಾಗಿ ವ್ಯಾಖ್ಯಾನಿಸಲಾಗಿದೆ.  ಜೊತೆಗೆ ವೃತ್ತಿ ತೆರಿಗೆ ಕಾಯಿದೆ ಸೆಕ್ಷನ್ 30 ರ ಅಡಿಯಲ್ಲಿ, ವೃತ್ತಿ ತೆರಿಗೆ ಅಡಿಯಲ್ಲಿ ನೋಂದಾಯಿಸಲ್ಪಟ್ಟ  ವ್ಯಾಪಾರಿಗಳು  ಯಾವುದೇ ಸ್ಥಳೀಯ ತೆರಿಗೆಯನ್ನು (ವೃತ್ತಿಯ ಮೇಲಿನ ಕಾರ್ಪೊರೇಷನ್ ತೆರಿಗೆ) ಪಾವತಿಸಬೇಕಾಗಿಲ್ಲ ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ. ಹಾಗಾಗಿ ಇದನ್ನೆಲ್ಲ ಪರಿಗಣಿಸದೆ ಪಾಲಿಕೆಯ ಅಧಿಕಾರಿಗಳು ಟ್ರೇಡ್ ಲೈಸನ್ಸ್ ಗೆ ಒತ್ತಡ ಹೇರುತ್ತಿದ್ದಾರೆ ಎಂದು ಅಧ್ಯಕ್ಷ ರೋಹನ್ ಜುವಳಿ ಆರೋಪಿಸಿದರು.

ಎಂಎಸ್‌ಎಂಇ ಅಡಿಯಲ್ಲಿ ನೋಂದಾಯಿಸಲಾದ ಕೈಗಾರಿಕೆಗಳು ಮತ್ತು ವಹಿವಾಟುಗಳು ಟ್ರೇಡ್ ಲೈಸೆನ್ಸ್ ಅಡಿಯಲ್ಲಿ ನೋಂದಾಯಿಸಲು ಹೊಣೆಗಾರರಾಗಿರುವುದಿಲ್ಲ, ಅದರ ನಕಲನ್ನು ಸಹ ಲಗತ್ತಿಸಲಾಗಿದೆ, ಈ ಹಿಂದೆ ಎಂಎಸ್‌ಎಂಇ ಕೇವಲ ಕೈಗಾರಿಕೆಗಳಿಗೆ ಸೀಮಿತವಾಗಿತ್ತು, ಆದರೆ ಇತ್ತೀಚಿನ ತಿದ್ದುಪಡಿಗಳು ವ್ಯಾಪಾರಿಗಳನ್ನು ಸಹ ಒಳಗೊಂಡಿವೆ. MSME ಅಡಿಯಲ್ಲಿ ಮತ್ತೆ ವ್ಯಾಪಾರ ಪರವಾನಗಿಯನ್ನು ಪಡೆಯುವುದು ಅಗತ್ಯವಿರುವುದಿಲ್ಲ.

ಕೊರೋನಾದಿಂದಾಗಿ ಈಗಾಗಲೆ ವ್ಯಾಪಾರ ವಹಿವಾಟು ನಷ್ಟದಲ್ಲಿವೆ. ಈ ಮಧ್ಯೆ ಮೂರೂ ಕಾಯಿದೆಗಳನ್ನು ಉಲ್ಲಂಘಿಸಿ ಟ್ರೇಡ್ ಲೈಸನ್ಸ್ ಫೀ ತುಂಬುವಂತೆ ಒತ್ತಡ ಹೇರಲಾಗುತ್ತಿದೆ. ತಕ್ಷಣ ಇದನ್ನು ತಡೆಯಬೇಕು ಎಂದು ಮನವಿ ಸಲ್ಲಿಸಲಾಯಿತು.

ದೀಪಾವಳಿ ಹಬ್ಬದವರೆಗೆ ಯಾವುದೇ ವರ್ತಕರ ಅಂಗಡಿಗಳಿಗೆ ಬಲವಂತವಾಗಿ ಟ್ರೇಡ್ ಲೈಸೆನ್ಸ್ ಜಾರಿ ಮಾಡದಂತೆ ಅಧಿಕಾರಿಗಳಿಗೆ ಸೂಚನೆ ನೀಡುವಂತೆ ಆಯುಕ್ತರಿಗೆ ಮನವಿ ಮಾಡಿದರು. ದೀಪಾವಳಿ ಹಬ್ಬದ ನಂತರ ಎಲ್ಲಾ ವರ್ತಕರೊಂದಿಗೆ ಸಭೆ ನಡೆಸಿ ಸ್ಪಷ್ಟನೆ ನೀಡುವಂತೆ ಮನವಿ ಮಾಡಿದರು.

ಈ ಸಂದರ್ಭದಲ್ಲಿ ಅಧ್ಯಕ್ಷ ರೋಹನ್ ಜುವಳಿ, ಉಪಾಧ್ಯಕ್ಷರಾದ ಹೇಮೇಂದ್ರ ಪೋರವಾಲ್ ಮತ್ತು  ಸಚಿನ್ ಸಬ್ನಿಸ್, ಗೌರವ ಕಾರ್ಯದರ್ಶಿ  ಪ್ರಭಾಕರ ನಾಗರಮುನೋಳಿ, ಜಂಟಿ ಕಾರ್ಯದರ್ಶಿ  ಸ್ವಪ್ನಿಲ್ ಶಾ, ಟ್ರೇಡಿಂಗ್ ಕಮಿಟಿ ಅಧ್ಯಕ್ಷ  ರಾಜೇಂದ್ರ ಮುತ್ಗೇಕರ್, ತೆರಿಗೆ ಸಮಿತಿ ಅಧ್ಯಕ್ಷ  ರೋಹಿತ್ ಕಪಾಡಿಯಾ, ವ್ಯವಸ್ಥಾಪನಾ ಸಮಿತಿ ಸದಸ್ಯ ಭೂಪೇಂದ್ರ ಪಟೇಲ್, ಕ್ರೆಡೈ ಕರ್ನಾಟಕ ಅಧ್ಯಕ್ಷ ಚೈತನ್ಯ ಕುಲಕರ್ಣಿ, ಟ್ರೇಡ್ ಸದಸ್ಯರು ಉಪಸ್ಥಿತರಿದ್ದರು.

ಹಿಂದೂಗಳ ಮೇಲೆ ದಾಳಿಗಳು ಹಿಂದೂ ಸಮಾಜವನ್ನು ನಿರ್ಮೂಲನೆ ಮಾಡಲು ಯೋಜಿತ ಪ್ರಯತ್ನ – ಅರುಣ್ ಕುಮಾರ್