ಪ್ರಗತಿವಾಹಿನಿ ಸುದ್ದಿ, ಕೋಲ್ಕೊತ್ತಾ: ಮಾರಣಾಂತಿಕ ಸಸ್ಯ ಶಿಲೀಂಧ್ರ ರೋಗ ಇದೀಗ ಭಾರತದಲ್ಲೇ ಪತ್ತೆಯಾಗಿದ್ದು ಕೋಲ್ಕೊತ್ತಾದ 61 ವರ್ಷದ ವ್ಯಕ್ತಿಯೊಬ್ಬರು ಈ ರೋಗಕ್ಕೆ ತುತ್ತಾದ ವಿಶ್ವದ ಮೊದಲ ವ್ಯಕ್ತಿಯಾಗಿ ದಾಖಲಾಗಿದ್ದಾರೆ.
ಸಸ್ಯ ಮೈಕಾಲಜಿಸ್ಟ್ ಆಗಿ ಕೆಲಸ ಮಾಡುತ್ತಿದ್ದ ಸೋಂಕಿತ ವ್ಯಕ್ತಿ ತಮ್ಮ ಸಂಶೋಧನಾ ಚಟುವಟಿಕೆಗಳ ಭಾಗವಾಗಿ ದೀರ್ಘಕಾಲದವರೆಗೆ ಕೊಳೆಯುತ್ತಿರುವ ವಸ್ತುಗಳು, ಅಣಬೆಗಳು ಮತ್ತು ವಿವಿಧ ಸಸ್ಯ ಶಿಲೀಂಧ್ರಗಳೊಂದಿಗೆ ಕೆಲಸ ಮಾಡುತ್ತಿದ್ದುದರಿಂದ ಈ ಕಾಯಿಲೆಗೆ ತುತ್ತಾಗಿದ್ದಾಗಿ ಆರೋಗ್ಯ ತಜ್ಞರು ತಿಳಿಸಿದ್ದಾರೆ.
ಗಡಸು ಧ್ವನಿ, ಕೆಮ್ಮು, ತೀವ್ರ ಆಯಾಸ ಮತ್ತು ಆಹಾರ ನುಂಗಲು ಕಷ್ಟವಾದ ನಂತರ ಆಸ್ಪತ್ರೆಗೆ ಭೇಟಿ ನೀಡಿದ್ದರು. ವೈದ್ಯರು ಮೊದಲಿಗೆ ಇದನ್ನು ಪತ್ತೆ ಮಾಡುವಲ್ಲಿ ಕಷ್ಟಪಟ್ಟರು. ಕಾರಣ ಈ ವ್ಯಕ್ತಿ ಮಧುಮೇಹ, ಎಚ್ಐವಿ ಸೋಂಕು, ಮೂತ್ರಪಿಂಡ ಅಥವಾ ಯಾವುದೇ ದೀರ್ಘಕಾಲದ ಕಾಯಿಲೆ, ಇಮ್ಯುನೊಸಪ್ರೆಸಿವ್ ಡ್ರಗ್ ಸೇವನೆ ಅಥವಾ ಆಘಾತದ ಇತಿಹಾಸವನ್ನು ಹೊಂದಿರಲಿಲ್ಲ. ಕೊನೆಗೆ ಸ್ಕ್ಯಾನ್‌ ಮಾಡಿದಾಗ ಕುತ್ತಿಗೆಯಲ್ಲಿ ಪ್ಯಾರಾಟ್ರಾಶಿಯಲ್ ಬಾವು ಕಂಡುಬಂದಿತ್ತು. ಇದೇ ವೇಳೆ ಕೀವು ಮಾದರಿಗಳ ಪರೀಕ್ಷೆಯಲ್ಲಿ ಕೊಂಡ್ರೊಸ್ಟೆರಿಯಮ್ ಪರ್ಪ್ಯೂರಿಯಮ್‌ನಿಂದ ಸೋಂಕು ತಗುಲಿರುವುದು ಬಹಿರಂಗವಾಗಿದೆ.
ವ್ಯಕ್ತಿಯ ಮಾದರಿಗಳನ್ನು ಸಂಶೋಧನೆಗಾಗಿ WHO ಸಹಯೋಗ ಕೇಂದ್ರಕ್ಕೆ ಕಳುಹಿಸಿದಾಗ ಅಲ್ಲಿ ಅದನ್ನು ‘ಕೊಂಡ್ರೊಸ್ಟೆರಿಯಮ್ ಪರ್ಪ್ಯೂರಿಯಮ್’ ಎಂದು ಪತ್ತೆ ಮಾಡಲಾಗಿದೆ.
ಪ್ರಗತಿವಾಹಿನಿ ಸುದ್ದಿಗಳನ್ನು ನಿಮ್ಮ ಸ್ನೇಹಿತರಿಗೆ, ಬೇರೆ ಗ್ರುಪ್ ಗಳಿಗೆ ಶೇರ್ ಮಾಡಿ
