ಎತ್ತ ಸಾಗುತ್ತಿದೆ ವಿತ್ತೀಯ ವಲಯ?

-ಕೆ.ಜಿ.ಕೃಪಾಲ್, ಆರ್ಥಿಕ ಅಂಕಣಕಾರರು

* ಬ್ಯಾಂಕ್ ಗಳ ಖಾತೆಯಲ್ಲಿರುವ ನಮ್ಮ ಹಣವನ್ನು ಹಿಂದೆ ಪಡೆಯಲು ಎ ಟಿ ಎಂ ಬಳಸಿದರೆ ಶುಲ್ಕ ವಿಧಿಸುವುದು, ಡಿಜಿಟಲೈಸೇಶನ್ ಎಂಬ ಬೊಬ್ಬೆಗೆ ಜನ ಸಾಮಾನ್ಯರನ್ನು ಬಲಿಪಶುಮಾಡಿದಂತಲ್ಲವೇ?

* ಹಿತಾಸಕ್ತ ಚಟುವಟಿಕೆಯ ಕಾರಣ ಬಿಗ್ ಬುಲ್ ಹಗರಣದ ಇತ್ಯರ್ಥದಲ್ಲಿ ಸೆಬಿ ಗೆ ರೂ.2.48 ಲಕ್ಷ ದಂಡ ಪಾವತಿಮಾಡಿರುವುದು.

* ಸೆನ್ಸೆಕ್ಸ್ ನ ಅಂಗವಾಗಿರುವ ಫಾರ್ಮ ಕಂಪನಿಯ ಪ್ರವರ್ತಕರ ವಿರುದ್ಧ ಹಿತಾಸಕ್ತ ಪ್ರಕರಣವನ್ನು ಪುನಃ ತನಿಖೆಗೊಳಪಡಿಸುವುದು.

* ಯಸ್ ಬ್ಯಾಂಕ್ ನ ಷೇರಿನ ಬೆಲೆ ರೂ.400 ರ ಸುಮಾರಿನಿಂದ ರೂ.150 ಕ್ಕೆ ಕುಸಿದ ಮೇಲೆ ಕಂಪನಿಯ ನೀತಿಪಾಲನೆಯ ಲೋಪದ ಕಾರಣ ಅದರ ಮುಖ್ಯಸ್ಥರನ್ನು ಮುಂದುವರೆಯಲು
ಬಿಡಲಿಲ್ಲವೆಂಬ ಆರ್ ಬಿ ಐ ನಿರ್ಧಾರ ಬಯಲು.

* ಮೂಲಾಧಾರಿತ ಪೇಟೆಯ ಚುಕ್ತಾ ಚಕ್ರದ ಕೊನೆ ದಿನ ಅಲ್ಕೆಮ್ ಲ್ಯಾಬ್ ಷೇರಿನ ಬೆಲೆ ಬಿ ಎಸ್ ಸಿ ಮತ್ತು ಎನ್ ಎಸ್ ಇ ಗಳ ಬೆಲೆಗಳಲ್ಲಿ ಸುಮಾರು ರೂ.60 ರಿಂದ 70 ರ ಅಂತರವಿತ್ತು.

*ಸರ್ಕಾರಿ ಸಾಲಪತ್ರಗಳು ಮತ್ತು ಖಜಾನೆ ಬಿಲ್ ಗಳಲ್ಲಿ ಸಣ್ಣ ಹೂಡಿಕೆದಾರರು ಹೂಡಿಕೆ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ಇದಕ್ಕಾಗಿ ಬಾಂಬೆ ಷೇರು ವಿನಿಮಯ ಕೇಂದ್ರವು ‘ ಬಿ ಎಸ್ ಇ-ಡೈರೆಕ್ಟ್ ‘ ಎಂಬ ವೇದಿಕೆಯನ್ನು ಸಿದ್ಧಗೊಳಿಸಿದೆ. ಈ ವೇದಿಕೆಯು ಸೋಮವಾರದಿಂದ ಕಾರ್ಯವನ್ನಾರಂಭಿಸಲಿದೆ.

* ತೈಲ ಮಾರಾಟ ಕಂಪನಿಗಳ ಷೇರುಗಳ ಬೆಲೆ ಕಚ್ಚಾ ತೈಲಬೆಲೆ, ಡಾಲರ್ ಬೆಲೆ ಕುಸಿಯುತ್ತಿದ್ದರೂ, ಸೂಕ್ತವಾದ ಖರೀದಿಯ ಬೆಂಬಲ ಪಡೆಯುತ್ತಿಲ್ಲ.

* ಕಳೆದೆರಡು ತ್ರೈಮಾಸಿಕಗಳಲ್ಲಿ ಹಾನಿಗೊಳಗಾಗಿರುವ ಭಾರ್ತಿ ಏರ್ಟೆಲ್ ಕಂಪನಿಯ ರೂ.5 ರ ಮುಖಬೆಲೆಯ ಷೇರಿನ ಬೆಲೆ .ರೂ.313 ರಲ್ಲಿರುವುದು, ಪ್ರತಿ ಷೇರಿಗೆ ಎಪ್ಪತ್ತು ಪೈಸೆ ಲಾಭಾಂಶ ನೀಡುವ ರೂ.5 ರ ಮುಖಬೆಲೆಯ ಕೋಟಕ್ ಮಹಿಂದ್ರಾ ಬ್ಯಾಂಕ್ ರೂ.1,230 ರಲ್ಲಿರುವುದು, ಹೆಚ್ಚು ಹೆಚ್ಚು ಲಾಭಗಳಿಸುವ, ಅಧಿಕ ಲಾಭಾಂಶ ಮತ್ತಿತರ ಕಾರ್ಪೊರೇಟ್ ಫಲಗಳನ್ನು ವಿತರಿಸುವ ಇಂಡಿಯನ್ ಆಯಿಲ್ ಷೇರಿನ ಬೆಲೆ ರೂ.135 ರಲ್ಲಿರುವುದು ವಿಸ್ಮಯಕಾರಿಯಲ್ಲವೇ?