*ಮಧ್ಯರಾತ್ರಿ ಬೆಂಗಳೂರಿನಲ್ಲಿ ಭಾರೀ ಸದ್ದು*: *ಬೆಚ್ಚಿಬಿದ್ದು ನಿದ್ದೆಯಿಂದೆದ್ದ ಸಿಲಿಕಾನ್‌ ಸಿಟಿ ಜನ*

ಪ್ರಗತಿವಾಹಿನಿ ಸುದ್ದಿ: ಬೆಂಗಳೂರಿನಲ್ಲಿ ಸೋಮವಾರ ರಾತ್ರಿ ಭರ್ಜರಿ ಮಳೆಯ ನಡುವೆ ಮಧ್ಯರಾತ್ರಿ ಏಕಾಏಕಿ ಕೇಳಿಬಂದ ಭಾರೀ ಸದ್ದಿಗೆ ನಗರದ ಹಲವೆಡೆ ಜನರು ಬೆಚ್ಚಿಬಿದ್ದಿದ್ದಾರೆ. ರಾತ್ರಿ 12.03ರ ಸುಮಾರಿಗೆ ಕೇಳಿಬಂದ ಸದ್ದು ಸುತ್ತಮುತ್ತಲಿನ ಮನೆಗಳ ಕಿಟಕಿಗಳೇ ನಡುಗುವಷ್ಟು ಜೋರಾಗಿತ್ತು ಎಂದು ಕೆಲವರು ಸಾಮಾಜಿಕ ಜಾಲತಾಣಗಳಲ್ಲಿ ಅನುಭವ ಹಂಚಿಕೊಂಡಿದ್ದಾರೆ.

ಇದ್ದಕ್ಕಿದ್ದಂತೆ ಕೇಳಿಬಂದ ಭಾರೀ ಶಬ್ದದಿಂದ ಕೆಲವರು ಮನೆಯಿಂದ ಹೊರಗೆ ಬಂದು ಏನಾಯಿತು ಎಂದು ಪರಿಶೀಲಿಸಿದ್ದಾರೆ. ಜಯನಗರ ಸೇರಿದಂತೆ ನಗರದ ವಿವಿಧ ಭಾಗಗಳಲ್ಲಿ ಇದೇ ರೀತಿಯ ಸದ್ದು ಕೇಳಿಬಂದಿದ್ದಾಗಿ ಹಲವರು ಸೋಷಿಯಲ್‌ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದ್ದಾರೆ.

ಮಧ್ಯರಾತ್ರಿ ಕೇಳಿಬಂದ ಈ ನಿಗೂಢ ಶಬ್ದದ ಮೂಲವೇನು ಎಂಬ ಕುತೂಹಲವೂ ಹೆಚ್ಚಾಗಿತ್ತು. ಕೆಲವರು ಸ್ಫೋಟದ ಬಗ್ಗೆ ಅನುಮಾನ ವ್ಯಕ್ತಪಡಿಸಿದರೆ, ಮತ್ತಷ್ಟು ಮಂದಿ ತಮಗೂ ಇದೇ ಸದ್ದು ಕೇಳಿಸಿತ್ತು ಎಂದು ಪ್ರತಿಕ್ರಿಯಿಸಿದ್ದಾರೆ.

ಆದರೆ, ಬಳಿಕ ಲಭ್ಯವಾದ ಹವಾಮಾನ ಮಾಹಿತಿಯ ಪ್ರಕಾರ ಇದು ಯಾವುದೇ ಸ್ಫೋಟದ ಸದ್ದಲ್ಲ ಎಂಬುದು ತಿಳಿದುಬಂದಿದೆ. ದಟ್ಟ ಮೋಡಗಳ ನಡುವೆ ಸಂಭವಿಸಿದ ಬಲಿಷ್ಠ ಸಿಡಿಲಿನ ಸದ್ದೇ ಬೆಂಗಳೂರಿನ ಹಲವು ಪ್ರದೇಶಗಳಲ್ಲಿ ಸ್ಫೋಟದಂತೆ ಕೇಳಿಸಿದೆ.

ರಾತ್ರಿ ವೇಳೆ ವಾತಾವರಣದಲ್ಲಿ ಹೆಚ್ಚಿನ ಆರ್ದ್ರತೆ ಇದ್ದಿದ್ದರಿಂದ ಸಿಡಿಲಿನ ಶಬ್ದವು ಮತ್ತಷ್ಟು ತೀವ್ರವಾಗಿ ಅನುಭವವಾಗಿರಬಹುದು ಎಂದು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾದ ಹವಾಮಾನ ಮಾಹಿತಿಯಲ್ಲಿ ಉಲ್ಲೇಖಿಸಲಾಗಿದೆ.

ಮಳೆ ಹಾಗೂ ಪ್ರಶಾಂತ ವಾತಾವರಣದ ನಡುವೆ ಸಿಡಿಲಿನ ಶಬ್ದ ಸುತ್ತಮುತ್ತಲಿನ ಕಟ್ಟಡಗಳು ಮತ್ತು ಪ್ರದೇಶಗಳಲ್ಲಿ ಪ್ರತಿಧ್ವನಿಸಿದ್ದರಿಂದ ದೊಡ್ಡ ಸ್ಫೋಟ ಸಂಭವಿಸಿದಂತೆ ಭಾಸವಾಗಿರಬಹುದು.

ಹೀಗಾಗಿ ಮಧ್ಯರಾತ್ರಿ ಬೆಂಗಳೂರಿನ ಜನರನ್ನು ಬೆಚ್ಚಿಬೀಳಿಸಿದ ಭಾರೀ ಸದ್ದು ಯಾವುದೇ ಸ್ಫೋಟದಿಂದ ಉಂಟಾದದ್ದಲ್ಲ, ಸಿಡಿಲಿನ ಅಬ್ಬರದಿಂದ ಉಂಟಾದ ಶಬ್ದ ಎಂಬುದು ಸದ್ಯದ ಮಾಹಿತಿ. ಭಾರೀ ಮಳೆಯ ಸಂದರ್ಭದಲ್ಲಿ ಗುಡುಗು-ಸಿಡಿಲಿನ ಬಗ್ಗೆ ಸಾರ್ವಜನಿಕರು ಮುನ್ನೆಚ್ಚರಿಕೆ ವಹಿಸುವುದು ಅಗತ್ಯವಾಗಿದೆ.

*ಮೈಸೂರು ದಸರಾಗೆ ಸೂರ್ಯ ಕಿರಣ್ ಶೋ*: ಮೂರು ದಿನ ವೈಮಾನಿಕ ಪ್ರದರ್ಶನ* – Pragati Vahini