*ಬರ್ತ್‌ಡೇಗೆ ಗನ್‌ ಗಿಫ್ಟ್‌ ಕೊಡಿಸಿದ ತಾಯಿ*: *ಅದೇ ಗನ್‌ನಿಂದ ಮೂವರು ಮಕ್ಕಳು, ಓರ್ವ ಶಿಕ್ಷಕಿಯನ್ನು ಕೊಂದ ಮಗ*
ಪ್ರಗತಿವಾಹಿನಿ ಸುದ್ದಿ: ಹುಟ್ಟುಹಬ್ಬದ ಉಡುಗೊರೆಯಾಗಿ ತಾಯಿ ನೀಡಿದ್ದ ಬಂದೂಕೇ ಭೀಕರ ದುರಂತಕ್ಕೆ ಕಾರಣವಾಗಿದೆ. 16 ವರ್ಷದ ಬಾಲಕನೊಬ್ಬ ಒರೆಗಾನ್ ರಾಜ್ಯದ ಬೆಂಡ್ ನಗರದ ಸಿಲ್ವರ್ ರೈಲ್ ಎಲಿಮೆಂಟರಿ ಶಾಲೆಗೆ ನುಗ್ಗಿ ಗುಂಡಿನ ದಾಳಿ ನಡೆಸಿದ್ದಾನೆ. ಈ ಘಟನೆಯಲ್ಲಿ ಮೂವರು ಪುಟ್ಟ ಮಕ್ಕಳು ಹಾಗೂ 25 ವರ್ಷದ ಶಿಕ್ಷಕಿ ಮೃತಪಟ್ಟಿದ್ದಾರೆ. ಘಟನೆಯಿಂದ ಆಘಾತ ವ್ಯಕ್ತವಾಗಿದ್ದು, ಅಪ್ರಾಪ್ತರಿಗೆ ಬಂದೂಕು ಸಿಗುವುದರ ಅಪಾಯದ ಕುರಿತು ಮತ್ತೆ ಚರ್ಚೆ ಆರಂಭವಾಗಿದೆ.
ಮೃತ ವಿದ್ಯಾರ್ಥಿಗಳಲ್ಲಿ ಐದು ವರ್ಷದ ರೋಮ್ ಸಮ್ಮರ್ ಕೂಡ ಸೇರಿದ್ದಾರೆ. ಎಂಟು ಮತ್ತು 11 ವರ್ಷದ ಇನ್ನಿಬ್ಬರು ಬಾಲಕರು ದಾಳಿಯಲ್ಲಿ ಪ್ರಾಣ ಕಳೆದುಕೊಂಡಿದ್ದಾರೆ. ಮಕ್ಕಳಿಗೆ ಶಿಕ್ಷಣ ನೀಡುತ್ತಿದ್ದ 25 ವರ್ಷದ ಶಿಕ್ಷಕಿ ಮೇಗನ್ ಲ್ಯಾಂಬರ್ಟ್ ಕೂಡ ಗುಂಡೇಟಿಗೆ ಬಲಿಯಾಗಿದ್ದಾರೆ. ಮತ್ತೊಬ್ಬ ಬಾಲಕಿ ಹಾಗೂ ಇನ್ನೋರ್ವ ಶಿಕ್ಷಕಿ ಗಂಭೀರವಾಗಿ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗಿದೆ.
ಈ ದಾಳಿಗೆ ಬಳಸಿದ ‘ಮಾವೆರಿಕ್ 88’ ಪಂಪ್-ಆಕ್ಷನ್ 12-ಗೇಜ್ ಶಾಟ್‌ಗನ್ ಅನ್ನು ಬಾಲಕನ ತಾಯಿ ಶೌಂಟೈ ನಿಕರ್ಸನ್ 2026ರ ಆಗಸ್ಟ್‌ನಲ್ಲಿ ಕಾನೂನುಬದ್ಧವಾಗಿ ಖರೀದಿಸಿದ್ದರು. ಬಳಿಕ ಹುಟ್ಟುಹಬ್ಬದ ಉಡುಗೊರೆಯಾಗಿ ಮಗನಿಗೆ ಬಂದೂಕು ನೀಡಿದ್ದರು. ಆದರೆ ಅದೇ ಬಂದೂಕು ಇದೀಗ ನಾಲ್ವರ ಪ್ರಾಣ ಬಲಿ ಪಡೆದ ಘಟನೆ ಅಮೆರಿಕಾದಲ್ಲಿ ನಡೆದಿದೆ. ಬಂದೂಕನ್ನು ಅಪ್ರಾಪ್ತನಿಗೆ ನೀಡಿದ ಸಂದರ್ಭ ಮತ್ತು ಅದರ ಸುರಕ್ಷಿತ ಸಂಗ್ರಹಣೆ ಕುರಿತು ತನಿಖಾಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ.
ಶಾಲೆಗೆ ತೆರಳುವ ಮೊದಲು ಬಾಲಕ ಚಲಿಸುತ್ತಿದ್ದ ಪಿಕಪ್ ಟ್ರಕ್ ಒಂದರತ್ತ ಗುಂಡು ಹಾರಿಸಿದ್ದ. ಟ್ರಕ್ ಚಾಲಕ ತಕ್ಷಣ ತುರ್ತು ಸಹಾಯವಾಣಿ 911ಕ್ಕೆ ಕರೆ ಮಾಡಿ ದೂರು ನೀಡಿದ್ದ. ಬಳಿಕ ಬಾಲಕ ಶಾಲೆಯೊಳಗೆ ನುಗ್ಗಿ ಗುಂಡಿನ ದಾಳಿ ನಡೆಸಿದ್ದಾನೆ ಎಂದು ಪೊಲೀಸ್ ತನಿಖೆಯಲ್ಲಿ ತಿಳಿದುಬಂದಿದೆ. ಶಾಲೆಯ ವಿಶೇಷ ಅಗತ್ಯಗಳಿರುವ ಮಕ್ಕಳ ತರಗತಿಯಲ್ಲಿ ದಾಳಿ ನಡೆದಿದ್ದು, ಅಲ್ಲಿದ್ದ ಮಕ್ಕಳು ಮತ್ತು ಶಿಕ್ಷಕರು ಗುಂಡೇಟಿಗೆ ತುತ್ತಾಗಿದ್ದಾರೆ.
ದಾಳಿಯ ವೇಳೆ ಶಾಲೆಯಲ್ಲಿದ್ದ ಶಿಕ್ಷಕಿಯೊಬ್ಬರು ಬಾಲಕನನ್ನು ತಡೆಯಲು ಪ್ರಯತ್ನಿಸಿ ಆತನೊಂದಿಗೆ ಹೋರಾಡಿದ್ದಾರೆ. ಇದೇ ಸಂದರ್ಭದಲ್ಲಿ ಶಾಲೆಯಲ್ಲಿದ್ದ ಮಕ್ಕಳ ಪೋಷಕರೊಬ್ಬರಾದ 36 ವರ್ಷದ ಕೇಲಬ್ ಜಿಯಾಮಾಂಕೊ ಮಧ್ಯಪ್ರವೇಶಿಸಿ ಬಂದೂಕುಧಾರಿಯನ್ನು ಗುಂಡಿಕ್ಕಿ ಕೊಂದಿದ್ದಾರೆ. ಇದರಿಂದ ಮತ್ತಷ್ಟು ಜೀವಹಾನಿಯಾಗುವುದು ತಪ್ಪಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪೊಲೀಸರ ಪ್ರಕಾರ, ದಾಳಿ ಕೆಲವೇ ನಿಮಿಷಗಳಲ್ಲಿ ನಡೆದಿದ್ದು, ಘಟನೆಯ ಹಿಂದಿನ ಉದ್ದೇಶದ ಕುರಿತು ತನಿಖೆ ಮುಂದುವರಿದಿದೆ.
ಈ ದುರಂತದ ಬೆನ್ನಲ್ಲೇ ಅಮೆರಿಕದಲ್ಲಿ ಬಂದೂಕುಗಳ ಲಭ್ಯತೆ, ಅಪ್ರಾಪ್ತರ ಕೈಗೆ ಶಸ್ತ್ರಾಸ್ತ್ರಗಳು ತಲುಪದಂತೆ ತಡೆಯುವ ಕ್ರಮಗಳು ಹಾಗೂ ಶಾಲೆಗಳ ಭದ್ರತೆಯ ಕುರಿತು ಚರ್ಚೆ ತೀವ್ರಗೊಂಡಿದೆ. ತಾಯಿ ಕಾನೂನುಬದ್ಧವಾಗಿ ಖರೀದಿಸಿದ್ದ ಬಂದೂಕು ಮಗನ ಕೈಗೆ ಹೇಗೆ ತಲುಪಿತು ಎಂಬ ಪ್ರಶ್ನೆಯೂ ಮಹತ್ವ ಪಡೆದುಕೊಂಡಿದೆ. ಮಕ್ಕಳ ಸುರಕ್ಷತೆ ಮತ್ತು ಬಂದೂಕುಗಳ ಜವಾಬ್ದಾರಿಯುತ ನಿರ್ವಹಣೆಯ ಕುರಿತು ಮತ್ತೊಮ್ಮೆ ಗಂಭೀರ ಚಿಂತನೆ ಅಗತ್ಯವಾಗಿದೆ.
ಪ್ರಗತಿವಾಹಿನಿ ಸುದ್ದಿಗಳನ್ನು ನಿಮ್ಮ ಸ್ನೇಹಿತರಿಗೆ, ಬೇರೆ ಗ್ರುಪ್ ಗಳಿಗೆ ಶೇರ್ ಮಾಡಿ
