*ಯೋಧ ದೈಹಿಕ ಸಂಪರ್ಕ ನಡೆಸಿಲ್ಲ ಆದ್ರೂ ಪತ್ನಿ ಗರ್ಭಿಣಿ: ಮಗುವಿನ ಡಿಎನ್ಎ ಟೆಸ್ಟ್ ಗೆ ಹೈ ಕೋರ್ಟ್ ಆದೇಶ*
ಪ್ರಗತಿವಾಹಿನಿ ಸುದ್ದಿ: ಮದುವೆಯಾದ ಪತ್ನಿ ತನಗೆ ಮೋಸ ಮಾಡಿದ್ದಾಳೆ. ಪತ್ನಿ ಜೊತೆ ದೈಹಿಕ ಸಂಪರ್ಕ ಇಲ್ಲದೆ ಗರ್ಭಿಣಿಯಾಗಿದ್ದು ಹೇಗೆ? ಎಂದು ಯೋಧ ಹೈಕೋರ್ಟ್ ಮೊರೆ ಹೋಗಿದ್ದು, ಮಗುವಿನ ಡಿಎನ್ಎ ಟೆಸ್ಟ್ಗೆ ಹೈ ಕೋರ್ಟ್ ಆದೇಶ ನೀಡಿದೆ.
ಈ ಘಟನೆ ಮಧ್ಯಪ್ರದೇಶದ ಇಂದೋರ್ನಲ್ಲಿ ನಡೆದಿದ್ದು, ಇತ್ತ ಯೋಧನ ಪತ್ನಿಯ ಮನವಿಯನ್ನು ಹೈಕೋರ್ಟ್ ತಿರಸ್ಕರಿಸಿದೆ.
ಮೋಸ ಮಾಡಿರುವ ಪತ್ನಿಯಿಂದ ವಿಚ್ಚೇದನ ನೀಡಬೇಕು ಎಂದು ಯೋಧ ಕೋರಿದ್ದ. ಮನವಿ ಪುರಸ್ಕರಿಸಿದ ಹೈಕೋರ್ಟ್, ಮಗುವಿನ ಡಿಎನ್ಎ ಟೆಸ್ಟ್ಗೆ ಆದೇಶ ನೀಡಿದೆ.
ಭಾರತೀಯ ಯೋಧ ಮದುವೆಯಾದ ಬಳಿಕ ಕೆಲ ದಿನಗಳ ಕಾಲ ಪತ್ನಿ ಜೊತೆಗಿದ್ದು ಕರ್ತವ್ಯಕ್ಕೆ ಮರಳಿದ್ದರು. ಇದರ ನಡುವೆ 6 ತಿಂಗಳಿಗೆ ಒಮ್ಮೆ ರಜೆ ಮೇಲೆ ಬಂದು ಕುಟುಂಬದ ಜೊತೆ ಕಾಲ ಕಳೆದಿದ್ದಾರೆ. ಆದರೆ ಮತ್ತೊಮ್ಮೆ 8 ತಿಂಗಳು ಬಿಟ್ಟು ರಜೆ ಮೇಲೆ ಬಂದಾಗ ಯೋಧನಿಗೆ ಆಘಾತವಾಗಿದೆ. ಕಾರಣ ಪತ್ನಿ ಮೂರು ತಿಂಗಳ ಗರ್ಭಿಣಿ ಎಂದು ಗುಡ್ ನ್ಯೂಸ್ ಹೇಳಿದ್ದಾರೆ.
ಕಳೆದ 8 ತಿಂಗಳಿನಿಂದ ಯೋಧ ಮನೆಗೆ ಮರಳಿಲ್ಲ. ಪತ್ನಿ ಜೊತೆ ಕಾಲ ಕಳೆದಿಲ್ಲ, ದೈಹಿಕ ಸಂಪರ್ಕ ನಡೆಸಿಲ್ಲ. ಹೀಗಾಗಿ ಪತ್ನಿ ಮೂರು ತಿಂಗಳ ಗರ್ಭಿಣಿಯಾಗಿದ್ದು ಹೇಗೆ? 8 ತಿಂಗಳ ಹಿಂದೆ ಬಂದ ಸಂದರ್ಭದಲ್ಲೇ ಪತ್ನಿ ಗರ್ಭಿಣಿಯಾಗಿದ್ದರೆ, 7 ತಿಂಗಳ ಗರ್ಭಿಣಿಯಾಗಬೇಕಿತ್ತು. ಪತ್ನಿ ಮೋಸ ಮಾಡಿದ್ದಾಳೆ ಎಂದು ಯೋಧ ಮಧ್ಯಪ್ರದೇಶ ಹೈಕೋರ್ಟ್ ಮೆಟ್ಟಿಲೇರಿದ್ದರು.
ಇತ್ತ ಪತ್ನಿ ಡಿಎನ್ಎ ಪರೀಕ್ಷೆ ವಿರೋಧಿಸಿ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು. ಮಗು ಬೆಳೆಯುತ್ತಿದೆ. ಡಿಎನ್ಎ ಪರೀಕ್ಷೆಯಿಂದ ಮಗುವಿನ ಖಾಸಗೀತನಕ್ಕೆ ಧಕ್ಕೆಯಾಗಲಿದೆ. ಇಷ್ಟೇ ಅಲ್ಲ ಈ ಪರೀಕ್ಷೆಗಳಿಂದ ಮಗು ಆಘಾತಗೊಳ್ಳಲಿದೆ. ಮಗುವಿನ ಸ್ವಾತಂತ್ರ್ಯ, ಖಾಸಗೀತನದ ಉಲ್ಲಂಘನೆ ಕಾನೂನು ವಿರೋಧಿ ನಡೆ ಎಂದು ಪತ್ನಿ ವಾದಿಸಿದ್ದರು. ಆದರೆ ಹೈಕೋರ್ಟ್ ಯೋಧನ ಪತ್ನಿ ವಾದ ತಳ್ಳಿಹಾಕಿದೆ.
ಪತಿ ಜವಾಬ್ದಾರಿಗಳಿಂದ ಓಡಿ ಹೋಗುತ್ತಿಲ್ಲ, ಮಗುವಿನ ತಂದೆ ಯಾರು? ಅದರ ಹೊಣೆ ಯಾರಿಗೆ? ಅನ್ನೋ ವಿಚಾರದಲ್ಲಿ ಸ್ಪಷ್ಟತೆ ಕೇಳುತ್ತಿದ್ದಾರೆ. ಈ ಸ್ಪಷ್ಟತೆ ಸಿಗಲು ಡಿಎನ್ಎ ಟೆಸ್ಟ್ ಅನಿವಾರ್ಯವಾಗಿದೆ. ಹೀಗಾಗಿ ಮಗುವಿನ ಜವಾಬ್ದಾರಿ ಯಾರು ತೆಗೆದುಕೊಳ್ಳಬೇಕು ಅನ್ನೋದಕ್ಕೆ ಡಿಎನ್ಎ ಟೆಸ್ಟ್ಗೆ ಆದೇಶ ನೀಡುತ್ತಿದ್ದೇವೆ ಎಂದ ಕೋರ್ಟ್ ಹೇಳಿದೆ.
