*ಮದುವೆಯಾಗುವುದಾಗಿ ನಂಬಿಸಿ ಲೈಂಗಿಕ ಕಿರುಕುಳ: ಮನನೊಂದ ಖ್ಯಾತ ನಟಿಯ ಮಾವನ ಮಗಳು ಆತ್ಮಹತ್ಯೆ*
ಪ್ರಗತಿವಾಹಿನಿ ಸುದ್ದಿ: ಖ್ಯಾತ ನಟಿ ಆಶಿಕಾ ರಂಗನಾಥ್ ಅವರ ಮಾವನ ಮಗಳು ಯುವಕನಿಂದ ಮೋಸ ಹೋಗಿ ಲೈಂಗಿಕ ಕಿರುಕುಳ, ಹಿಂಸೆಗೆ ಬೇಸತ್ತು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ನಡೆದಿದೆ.
ಹಾಸನ ಮೂಲದ ಅಚಲ (22) ಆತ್ಮಹತ್ಯೆಗೆ ಶರಣಾಗಿರುವ ಯುವತಿ. ಬೆಂಗಳೂರಿನ ಪಾಂಡುರಂಗನಗರದಲ್ಲಿ ಸಂಬಂಧಿಕರ ಮನೆಯಲ್ಲಿ ಆತ್ಮಹತ್ಯೆಗೆ ಶರಣಾಗಿದ್ದಾಳೆ. ೮ ದಿನಗಳ ಹಿಂದೆ ನಡೆದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.
ಹಾಸನ ಮೂಲದ ಅಚಲ ಇಂಜಿನಿಯರಿಂಗ್ ಪದವೀಧರೆ. ಹಾಸನದವನೇ ಆದ ಮಯಾಂಕ್ ಎಂಬಾತ ಅಚಲಾಳನ್ನು ಮದುವೆಯಾಗುವುದಾಗಿ ನಂಬಿಸಿದ್ದ. ಅಲ್ಲದೇ ಮಯಾಂಕ್ ಹಾಗೂ ಆತನ ತಾಯಿ ಮೈನಾ ಇಬ್ಬರೂ ಅಚಲಾ ಕುಟುಂಬದವರಿಗೆ ಸಂಬಂಧಿಕರು ಕೂಡ ಆಗಿದ್ದರು. ಹಾಗಾಗಿ ಅಚಲಾಳ ಮನೆಯಲ್ಲಿ ಕೂಡ ಮದುವೆಗೆ ಒಪ್ಪಿದ್ದರು. ಮದುವೆಗೆ ಎರಡೂ ಕಡೆಯವರು ಒಪ್ಪಿದ್ದರಿಂದ ಇಬ್ಬರು ಒಟ್ಟಿಗೆ ಓಡಾಡುವುದು, ಪರಸ್ಪರ ಪ್ರೀತಿ ಸಲುಗೆಯಿಂದ ಇದ್ದರು ಎನ್ನಲಾಗಿದೆ. ಆದರೆ ಕೆಲ ದಿನಗಳಿಂದ ಮಯಾಂಕ್ ಅಚಲಾಗೆ ಕಿರುಕುಳ ನೀಡುತ್ತಿದ್ದ. ಅಲ್ಲದೇ ಆತನಿಗೆ ಹಲವು ಹುಡುಗಿಯರ ಸಹವಾಸವಿರುವುದು, ದುಶ್ಚಟಗಳ ದಾಸ ಎಂಬುದು ಅಚಲಾಗೆ ಗೊತ್ತಾಗಿದೆ. ಈ ಬಗ್ಗೆ ಅಚಲಾ ಮನೆಯಲ್ಲಿ ವಿಷಯ ತಿಳಿಸಿದ್ದಳು. ಫೇಸ್ ಬುಕ್ ಇನ್ ಸ್ಟಾ ಗ್ರಾಂ ಗಳಲ್ಲಿ ಬೇರೆ ಬೇರೆ ಯುವತಿಯರೊಂದಿಗಿನ ಆತನ ಫೋಟೋ ಇರುವ ಬಗ್ಗೆಯೂ ಅಚಲಾ ಮನೆಯವರಿಗೆ ಹೇಳಿದ್ದಳು. ಆತನ ವರ್ತನೆ ಹಾಗೂ ತನಗೆ ನೀಡಿರುವ ಲೈಂಗಿಕ ಕಿರುಕುಳದಿಂದ ತೀವ್ರವಾಗಿ ಅಚಲಾ ಮನನೊಂದಿದ್ದಳು.
ಮಯಾಂಕ್ ತಾಯಿಗೆ ಅಚಲಾಳ ತಾಯಿ ಈ ಬಗ್ಗೆ ಹೇಳಿದ್ದರಂತೆ ಮದುವೆಗೂ ಮುನ್ನವೇ ಹಿಂಸೆ, ಕಿರುಕುಳ ನೀಡುತ್ತಿರುವ ಮಗನ ವರ್ತನೆ ಸರಿಯಿಲ್ಲ. ಈ ಮದುವೆ ವಿಚಾರ ಇಲ್ಲಿಗೆ ನಿಲ್ಲಿಸುವುದಾಗಿ ಹೇಳಿದ್ದರಂತೆ. ಆದರೆ ಮಯಾಂಕ್ ತಾಯಿ ಸ್ವಲ್ಪ ಕಲಾವಕಾಶ ಕೊಡಿ, ಎಲ್ಲವೂ ಸರಿಹೋಗುತ್ತೆ ಎಂದಿದ್ದರಂತೆ. ಅಷ್ಟರಲ್ಲಿ ಮಯಾಂಕ್ ಇಂಜಿನಿಯರಿಂಗ್ ಪದವಿ ಕೂಡ ಮುಗಿಸಿಲ್ಲ. ಸುಳ್ಳು ಹೇಳಿದ್ದಾನೆ ಎಂನ ವಿಚಾರವೂ ಅಚಲಾ ಕುಟುಂಬಕ್ಕೆ ಗೊತ್ತಾಗಿದೆ. ಇದರಿಂದ ಮಗಳನ್ನು ಅಚಲಾ ತಾಯಿ ಬೆಂಗಳೂರಿಗೆ ಕಳುಹಿಸಿದ್ದರಂತೆ. ಅಚಲಾ ಸಂಬಂಧಿಕರ ಮನೆಯಲ್ಲಿದ್ದು ಬೆಂಗಳೂರಿನಲ್ಲಿ ಕೆಲಸ ಹುಡುಕುತ್ತಿದ್ದರು. ಆದರೆ ಅಲ್ಲಿಗೂ ಬಂದು ಹಿಂಸಿಸುವುದು, ಗಲಾಟೆ ಮಾಡುವುದು ಮಾಡಿದ್ದನಂತೆ. ಕೆಲ ತಿಂಗಳಿಂದ ತೀವ್ರವಾಗಿ ಮನನೊಂದಿದ್ದ ಅಚಲಾ 8 ತಿಂಗಳ ಹಿಂದೆ ಆತ್ಮಹತ್ಯೆಗೆ ಶರಣಾಗಿದ್ದಾಳೆ.
ಮಯಾಂಕ್ ಹಾಗೂ ಆತನ ತಾಯಿ ವಿರುದ್ಧ ಅಚಲಾ ಕುಟುಂಬದವರು ದೂರು ನೀಡಿದ್ದು, ಪ್ರಕರಣ ದಾಖಲಾಗುತ್ತಿದ್ದಂತೆ ಮಯಾಂಕ್ ನಾಪತ್ತೆಯಾಗಿದ್ದಾನೆ ಎಂದು ತಿಳಿದುಬಂದಿದೆ.
