ಪ್ರಗತಿವಾಹಿನಿ ಸುದ್ದಿ, ಸುಳ್ಯ: ಕೋಟದಲ್ಲಿ ಸ್ಕೂಟಿ ಕದ್ದು ಸುಳ್ಯಕ್ಕೆ ಬಂದು ಹೋಟೆಲ್ ಒಂದರ ಶೌಚಾಲಯದಲ್ಲಿ ನಿದ್ದೆ ಹೋದ ಮಹಾಶಯ ಈಗ ಕಂಬಿ ಎಣಿಸುತ್ತಿದ್ದಾನೆ.
ಸುಲ್ತಾನ್ ಎಂಬಾತನೇ ಬಂಧಿತ ಆರೋಪಿ. ಈತ ಉಡುಪಿ ಜಿಲ್ಲೆಯ ಕೋಟ ಪೊಲೀಸ್ ಠಾಣೆ ವ್ಯಾಪ್ತಿಯಿಂದ ಸ್ಕೂಟಿಯೊಂದನ್ನು ಕದ್ದು ಪರಾರಿಯಾದ. ಅದನ್ನು ಮಂಡ್ಯಕ್ಕೆ ಒಯ್ಯುವ ಮಾರ್ಗಮಧ್ಯೆ ಸುಳ್ಯ ಸಮೀಪದ ಗೂನಡ್ಕದ ಹೋಟೆಲ್ ಒಂದಕ್ಕೆ ಹೋಗಿ ಅಲ್ಲಿನ ಶೌಚಾಲಯ ಪ್ರವೇಶಿಸಿದ್ದ.
ಅರ್ಧ ತಾಸು ಕಳೆದರೂ ಹೊರಗೆ ಬಾರದ ಕಾರಣ ಹೋಟೆಲ್ ಸಿಬ್ಬಂದಿ ಬಾಗಿಲು ಬಡಿದಿದ್ದಾರೆ. ಉತ್ತರ ಬಾರದಿದ್ದಾಗ ಕಿಟಕಿ ಬಾಗಿಲು ತೆರೆದು ಇಣುಕಿದ್ದಾರೆ. ಈ ವೇಳೆ ಸುಲ್ತಾನ ಬಿದ್ದುಕೊಂಡಿರುವುದನ್ನು ಕಂಡು ಗಾಬರಿಯಾಗಿದ್ದಾರೆ. ಮೂರ್ಛೆ ಹೋಗಿರಬಹುದೆಂದು ಸಂದೇಹಪಟ್ಟು ನೀರು ಚಿಮುಕಿಸಿದಾಗ ಸುಲ್ತಾನ ಗಾಢ ನಿದ್ದೆಯಿಂದೆದ್ದು ಆಕಳಿಸಿದ್ದಾನೆ.
ನಂತರ ಹೋಟೆಲ್ ನವರು ಈತನ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಅದರಂತೆ ಕಲ್ಲುಗುಂಡಿ ಬಳಿ ವಾಹನ ತಡೆದು ತಪಾಸಣೆ ನಡೆಸಿದಾಗ ಸ್ಕೂಟಿ ಕದ್ದು ತಂದಿರುವುದು ಬೆಳಕಿಗೆ ಬಂದಿದೆ. ಆರೋಪಿಯನ್ನು ಬಂಧಿಸಿ ಕಾನೂನು ಕ್ರಮ ಜರುಗಿಸಲಾಗಿದೆ.
ಪ್ರಗತಿವಾಹಿನಿ ಸುದ್ದಿಗಳನ್ನು ನಿಮ್ಮ ಸ್ನೇಹಿತರಿಗೆ, ಬೇರೆ ಗ್ರುಪ್ ಗಳಿಗೆ ಶೇರ್ ಮಾಡಿ
