ಪ್ರಗತಿವಾಹಿನಿ ಸುದ್ದಿ: ಬೆಳಕಿನ ಹಬ್ಬ ದೀಪಾವಳಿಯಲ್ಲಿ ಸಾಂಪ್ರದಾಯಿಕ ಸಿಹಿ ತಿನಿಸುಗಳನ್ನು, ಪ್ರೀತಿಪಾತ್ರರಿಗೆ ವಿಶೇಷ ಉಡುಗೊರೆಗಳನ್ನು ಕೊಡುವುದು ಸಹಜ. ಅದೇ ರೀತಿ ಇಲ್ಲೊಂದು ಸ್ವೀಟ್ ಅಂಗಡಿಯಲ್ಲಿ ಈ ಬಾರಿ ದೀಪಾವಳಿ ವಿಶೇಷ ಖಾದ್ಯವಾಗಿ ‘ಸ್ವರ್ಣ ಶಂಖ’ ಎಂಬ ಸ್ಪೆಷಲ್ ಸಿಹಿ ತಿನಿಸನ್ನು ಸಿದ್ಧಪಡಿಸಲಾಗಿದೆ.
ದೀಪಾವಳಿ ಹಬ್ಬಕ್ಕೆಂದೇ ವಿಶೇಷ ಬಾಣಸಿಗರನ್ನು ಕರೆಸಿ ಸಿದ್ಧಪಡಿಸಲಾದ ಅದ್ಭುತ ಸಿಹಿ ತಿನಿಸು ಇದಾಗಿದ್ದು. ಹೆಸರು ಕೇಳಿದರೇ ಸಾಂಪ್ರದಾಯಿಕ ಸಮೃದ್ಧಿಯ ಜೊತೆಗೆ ಆಧ್ಯಾತ್ಮಿಕ ಓರಣವನ್ನೂ ನೀಡಿದಂತಿದೆ. ದೀಪಾವಳಿ ಹಬ್ಬದ ಸಂಭ್ರಮದ ನಡುವೆ ಇಲ್ಲಿ ಸಿಹಿ ತಿನಿಸುಗಳಿಗೆ ಚಿನ್ನದ ಸ್ಪರ್ಶ ನೀಡಲಾಗಿದೆ.
ಹೌದು. ಅಮರಾವತಿಯಲ್ಲಿ ಹಬ್ಬದ ಸಿಹಿ ತಿನಿಸುಗಳಿಗೆ ಈ ಬಾರಿ ನಿಜಕ್ಕೂ ಬಂಗಾರದ ಸ್ಪರ್ಶ ಸಿಕ್ಕಿದೆ. ನಗರದಲ್ಲಿರುವ ‘ರಘುವೀರ್ ಸ್ವೀಟ್ಸ್ ಅಂಡ್ ನಮ್ಕೀನ್’ ಎಂಬ ಸಿಹಿತಿಂಡಿ ಅಂಗಡಿಯು, ದೀಪಾವಳಿ ಹಬ್ಬಕ್ಕಾಗಿ ‘ಸ್ವರ್ಣ ಶಂಖ’ ಎಂಬ ವಿಶೇಷ ತಿನಿಸೊಂದನ್ನು ಪರಿಚಯಿಸಿದೆ. ಇದರ ಬೆಲೆ ಕೇಳಿದರೆ ನಿಜಕ್ಕೂ ದಂಗಾಗುತ್ತೀರಿ.
ವಿಶೇಷ ಸಿಹಿ ತಿನಿಸಿನಷ್ಟೇ ವಿಶೇಷವಾಗಿದೆ ಈ ಸ್ವರ್ಣ ಶಂಖ್ ಸ್ವೀಟಿನ ಬೆಲೆ. ಪ್ರತಿ ಕೆಜಿಗೆ ₹24,000 ರೂ. ಇದೆ. 24 ಕ್ಯಾರೆಟ್ ಚಿನ್ನದ ಹಾಳೆಯಿಂದ ಅಲಂಕರಿಸಲ್ಪಟ್ಟ ಮತ್ತು ಆಕರ್ಷಕ ಶಂಖದ ಆಕಾರದಲ್ಲಿ ರೂಪಿಸಲಾದ ಈ ಸಿಹಿತಿಂಡಿಯು, ಗ್ರಾಹಕರ ನಡುವೆ ವಿಶೇಷ ಚರ್ಚೆಯ ವಿಷಯವಾಗಿದೆ.
‘ರಘುವೀರ್ ಸ್ವೀಟ್ಸ್’ನ ನಿರ್ದೇಶಕ ಚಂದ್ರಕಾಂತ್ ಪೋಪಟ್ ಅವರು ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. “ತನ್ನ ವಿಶಿಷ್ಟ ವಿನ್ಯಾಸ ಮತ್ತು ತಯಾರಿಕೆಯಲ್ಲಿ ಬಳಸಲಾದ ಅತ್ಯುನ್ನತ ಗುಣಮಟ್ಟದ ಪದಾರ್ಥಗಳಿಂದಾಗಿ ‘ಸ್ವರ್ಣ ಶಂಖ’ ಎಲ್ಲರ ಗಮನ ಸೆಳೆಯುತ್ತಿದೆ” ಎಂದು ತಿಳಿಸಿದ್ದಾರೆ.
ರಾಜಸ್ಥಾನದ ನುರಿತ ಕುಶಲಕರ್ಮಿಗಳು ತಮ್ಮ ಸಾಂಪ್ರದಾಯಿಕ ಕೌಶಲ್ಯವನ್ನು ಬಳಸಿ, ಈ ಸಿಹಿತಿಂಡಿಗೆ ಸುಂದರವಾದ ಶಂಖದ ಆಕಾರವನ್ನು ನೀಡಿದ್ದಾರೆ. ಇದನ್ನು ತಯಾರಿಸಲು ಉತ್ತಮ ಗುಣಮಟ್ಟದ ಮಾಮ್ರಾ ಬಾದಾಮಿ, ಪಿಶೋರಿ ಪಿಸ್ತಾ ಮತ್ತು ಶುದ್ಧ ಕೇಸರಿಯನ್ನು ಬಳಸಲಾಗಿದೆ.
ಇದರ ಮೇಲೆ 24 ಕ್ಯಾರೆಟ್ ಚಿನ್ನದ ಹಾಳೆಯನ್ನು ಅಂಟಿಸಲಾಗಿದ್ದು, ಇದು ಇದಕ್ಕೆ ವಿಶಿಷ್ಟವಾದ ಸುವರ್ಣ ವರ್ಚಸ್ಸನ್ನು ನೀಡುತ್ತದೆ. ಅತ್ಯುತ್ತಮ ಪದಾರ್ಥಗಳು ಮತ್ತು ಸೂಕ್ಷ್ಮ ಕಲಾಕೌಶಲ್ಯದ ಸಮ್ಮಿಲನವಿರುವ ‘ಸ್ವರ್ಣ ಶಂಖ’, ಕೇವಲ ಒಂದು ಸಿಹಿತಿಂಡಿಗಿಂತ ಮಿಗಿಲಾದ ವಿಶೇಷ ರಚನೆಯಾಗಿದೆ. ಶಂಖದ ಆಕಾರ ಮತ್ತು ಚಿನ್ನದ ಅಲಂಕಾರವು ಮಾರುಕಟ್ಟೆಯಲ್ಲಿ ಲಭ್ಯವಿರುವ ಇತರ ಸಿಹಿತಿಂಡಿಗಳಿಗಿಂತ ಇದನ್ನು ಭಿನ್ನವಾಗಿಸುತ್ತದೆ ಎಂದು ಹೇಳಿದರು.
‘ಸ್ವರ್ಣ ಶಂಖ’ ಎಂಬ ಹೆಸರಿಗೂ ವಿಶೇಷ ಮಹತ್ವವಿದೆ ಎಂದು ವಿವರಿಸಿದರು. ದೀಪಾವಳಿಯಲ್ಲಿ ‘ಲಕ್ಷ್ಮಿ ಪೂಜೆ’ಗೆ ಹೆಚ್ಚಿನ ಪ್ರಾಮುಖ್ಯತೆಯಿದೆ; ಹೀಗಾಗಿ, ಈ ಸಿಹಿತಿಂಡಿಯನ್ನು ಮಹಾಲಕ್ಷ್ಮಿ ದೇವಿಗೆ ಅರ್ಪಿಸುವ ನೈವೇದ್ಯದ ರೂಪದಲ್ಲಿ ಕಲ್ಪಿಸಲಾಗಿದೆ. ಸಾಂಪ್ರದಾಯಿಕವಾಗಿ ಶಂಖವನ್ನು ಶುಭ ಮತ್ತು ಸಮೃದ್ಧಿಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಈ ಸಂಕೇತವನ್ನು ಗಮನದಲ್ಲಿಟ್ಟುಕೊಂಡೇ, ಇದಕ್ಕೆ ‘ಸ್ವರ್ಣ ಶಂಖ’ ಎಂದು ಹೆಸರಿಡಲಾಗಿದೆ.
ಇದರ ತಯಾರಿಕೆಯಲ್ಲಿ ಬಳಸಲಾದ 24 ಕ್ಯಾರೆಟ್ ಚಿನ್ನದ ಹಾಳೆಯನ್ನು ಪ್ರಮಾಣೀಕೃತ ಪ್ರಯೋಗಾಲಯದಲ್ಲಿ ಪರೀಕ್ಷಿಸಲಾಗಿದೆ ಎಂದು ಪೋಪಟ್ ತಿಳಿಸಿದರು. ಅಲ್ಲದೆ, ಇದರ ಬಳಕೆಯು ‘ಫುಡ್ ಅಂಡ್ ಡ್ರಗ್ ಅಡ್ಮಿನಿಸ್ಟ್ರೇಷನ್’ (FDA) ನಿಯಮಗಳಿಗೆ ಅನುಗುಣವಾಗಿದೆ ಎಂದು ಹೇಳಿದರು.
ಕಳೆದ ವರ್ಷ, ಇಲ್ಲಿ ತಯಾರಿಸುವ ಚಿನ್ನದ ಲೇಪನದ ಸಿಹಿತಿಂಡಿಗಳಿಗೆ ಯುನೈಟೆಡ್ ಕಿಂಗ್‌ಡಮ್ ಮತ್ತು ಯುನೈಟೆಡ್ ಸ್ಟೇಟ್ಸ್‌ನಲ್ಲಿ ವಾಸಿಸುವ ಭಾರತೀಯರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಈ ವರ್ಷ, ‘ಸ್ವರ್ಣ ಶಂಖ’ (Swarn Shankh) ಹೆಸರಿನ ಈ ಸಿಹಿತಿಂಡಿಯನ್ನು ವಿದೇಶಗಳಲ್ಲಿರುವ ಗ್ರಾಹಕರಿಗೂ ಪೂರೈಸುವ ನಿರೀಕ್ಷೆಯಿದೆ.
ಮಹಾರಾಷ್ಟ್ರದ ವಿವಿಧ ಜಿಲ್ಲೆಗಳಿಂದ ಹಾಗೂ ಗುಜರಾತ್ ಮತ್ತು ರಾಜಸ್ಥಾನದಿಂದಲೂ ತಮ್ಮ ಅಂಗಡಿಗೆ ಆರ್ಡರ್‌ಗಳು ಬಂದಿವೆ ಎಂದು ಪೋಪಟ್ ಹೇಳಿದ್ದಾರೆ.
