*ಬಿಜೆಪಿ ಪ್ರತಿಭಟನೆಗೆ ನಾವು ಹೆದರಿಕೊಳ್ಳುತ್ತೇವಾ: ಡಿಕೆ ಶಿವಕುಮಾರ*

ಪ್ರಗತಿವಾಹಿನಿ ಸುದ್ದಿ, ಬೆಳಗಾವಿ: ಮಹಾತ್ಮಾ ಎಂದು ಪ್ರಖ್ಯಾತಿ ಪಡೆದ ನಾಯಕನ ಆಚರಣೆ ಮಾಡಬೇಕಾದರೆ ಯಾರೊ ಪ್ರತಿಭಟನೆ ಮಾಡಿದರೆ ಕಾಂಗ್ರೆಸ್ ಅವರು ಹೆದರಿಕೊಳ್ಳುತ್ತಾರಾ ಎಂದು ಬಿಜೆಪಿ ನಾಯಕರಿಗೆ ಡಿಸಿಎಂ ಡಿಕೆ ಶಿವಕುಮಾರ ಟಾಂಗ್ ಕೊಟ್ಟರು.

ಬೆಳಗಾವಿಯ ಪ್ರವಾಸಿ ಮಂದಿರದಲ್ಲಿ ಮಾಧ್ಯಮಗಳ ಜೊತೆ ಮಾತನಾಡಿದ ಅವರು, ಇದು ರಾಜಕಾರಣ ಅಲ್ಲ. ಇದು ದೇಶದ ಒಂದು ಇತಿಹಾಸ, ಗಾಂಧೀಜಿಯವರ ನಾಯಕತ್ವ, ದೇಶದ ನಾಯಕತ್ವಕ್ಕೆ ಹೋರಾಟ ಮಾಡಿದವರು, ನೂರು ವರ್ಷದ ಸಂಭ್ರಮ ಇದು ಪಕ್ಷದ ಕಾರ್ಯಕ್ರಮ ಅಲ್ಲ. ಕಾಂಗ್ರೆಸ್ ಪಕ್ಷ ಅವತ್ತು ಇತ್ತು, ಇವತ್ತು ಇದೆ. ಮಹಾತ್ಮಾ ಗಾಂಧೀಜಿಯವರು ಬೆಳಗಾವಿಗೆ ಬಂದು ಕಾಂಗ್ರೆಸ್ ಅಧಿವೇಶನದ ಅಧ್ಯಕ್ಷತೆ ವಹಿಸಿದ ದಿನಕ್ಕೆ ನೂರು ವರ್ಷ ತುಂಬುತ್ತಿರುವ ಹಿನ್ನೆಲೆಯಲ್ಲಿ ಒಂದು ಕಾರ್ಯಕಾರಣಿ ಸಭೆ ಮಾಡಿ, ಮುಂದೆ ಯಾವ ದಿಕ್ಕಿನಲ್ಲಿ ಈ ದೇಶ ಹೋಗಬೇಕು ‌ ಎಂಬುದನ್ನು ಚರ್ಚೆ ಮಾಡಲಿದ್ದೇವೆ ಎಂದರು

ಗಾಂಧೀಜಿಯವರು ಈ ದೇಶಕ್ಕೆ ಪ್ರಜಾಪ್ರಭುತ್ವ ಕೊಡಿಸಿದ್ದಾರೆ, ಸಂವಿಧಾನ ಕೊಡಿಸಿದ್ದಾರೆ. ರಾಷ್ಟ್ರ ಧ್ವಜ, ರಾಷ್ಟ್ರ ಗೀತೆ ಕೊಟ್ಟಿದ್ದಾರೆ. ಇದೆಲ್ಲವು ಗಾಂಧೀಜಿಯವರ ಮುಖಂಡತ್ವದಲ್ಲಿ ನಡೆದ ಘಟನೆಗಳು. ಇದೆಲ್ಲವನ್ನು ಸರಿಯಾದ ರೀತಿಯಲ್ಲಿ ಜಾರಿಗೆ ತರಬೇಕು. ಮಹಾತ್ಮಾ ಎಂದು ಪ್ರಖ್ಯಾತಿ ಪಡೆದ ನಾಯಕನ ಆಚರಣೆ ಮಾಡಬೇಕಾದರೆ ಯಾರೊ ಮಾಡುವ ಪ್ರತಿಭಟನೆಗೆ ಕಾಂಗ್ರೆಸ್ ನವರು ಹೆದರಿಕೊಳ್ಳುತ್ತಾರಾ?  ಈ ಡಿಕೆ ಶಿವಕುಮಾರ್ ಕಾಂಗ್ರೆಸ್ ಪಕ್ಷದ ಅಧ್ಯಕ್ಷ, ನಾ ಇನ್ನೂ ಇದ್ದೇನೆ. ನಾನು ಇನ್ನೂ ಸತ್ತಿಲ್ಲ ಇನ್ನು ಬದುಕಿದ್ದೇನೆ ಎಂದು ಬಿಜೆಪಿ ನಾಯಕರಿಗೆ ಟಾಂಗ್ ಕೊಟ್ಟರು.