*ಬೆಳಗಾವಿ ಕನ್ನಡ ಭವನ ವಶ ಆದೇಶಕ್ಕೆ ಕೋರ್ಟ್ ತಡೆಯಾಜ್ಞೆ : ಮಂಗಲಾ ಮೆಟಗುಡ್*
ಪ್ರಗತಿವಾಹಿನಿ ಸುದ್ದಿ, ಬೆಳಗಾವಿ: ಬೆಳಗಾವಿಯಲ್ಲಿನ ಕನ್ನಡ ಭವನವನ್ನು ವಶಕ್ಕೆ ಪಡೆಯುವ ಆದೇಶಕ್ಕೆ ನ್ಯಾಯಾಲಯ ತಡೆಯಾಜ್ಞೆ ನೀಡಿದೆ ಎಂದು ಬೆಳಗಾವಿ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷೆ ಮಂಗಲಾ ಮೆಟಗುಡ್ ಹೇಳಿದರು.
ಪತ್ರಿಕಾ ಪರಿಷತ್ತಿನಲ್ಲಿಂದು ಮಾತನಾಡಿದ ಅವರು ಎರಡು ದಿನಗಳ ಹಿಂದಷ್ಟೇ ಅಧಿಕಾರಿಗಳು ಬಂದು ಕನ್ನಡ ಭವನವನ್ನು ಸೀಜ ಮಾಡಿದ್ದರು. ಇದಕ್ಕೆ ವಿರುದ್ಧವಾಗಿ ಕನ್ನಡ ಭವನದ ಉಸ್ತುವಾರಿ ಸಮಿತಿಯು ನ್ಯಾಯಾಲಯದ ಮೊರೆ ಹೋಗಿ ಪ್ರಸ್ತುತ ಕನ್ನಡ ಭವನವನ್ನು ವಶಕ್ಕೆ ಪಡೆಯುವ ಆದೇಶಕ್ಕೆ ನ್ಯಾಯಾಲಯದಿಂದ ತಡೆಯಾಜ್ಞೆಯನ್ನು ಪಡೆಯಲಾಗಿದೆ ಎಂದು ವಿವರಿಸಿದರು.
ಕನ್ನಡ ಭವನದಲ್ಲಿ ಕನ್ನಡ ಪರ ಕಾರ್ಯಕ್ರಮಗಳು, ಸಾಹಿತ್ಯ ಕಾರ್ಯಕ್ರಮಗಳು, ಸಾಂಸ್ಕೃತಿಕ ಕಾರ್ಯಕ್ರಮಗಳು ನಿರಂತರವಾಗಿ ನಡೆಯುತ್ತಿವೆ. ಆ ಎಲ್ಲ ಕಾರ್ಯಕ್ರಮಗಳಿಗೆ ಉಸ್ತುವಾರಿ ಸಮಿತಿ ಠರಾ ವಿನಲ್ಲಿ ಪಾಸು ಮಾಡಿದ ನಿರ್ಣಯಗಳ ಪ್ರಕಾರ ಕಡಿಮೆ ಪ್ರಮಾಣದ ಶುಲ್ಕವನ್ನು ವಿಧಿಸಲಾಗುತ್ತಿದೆ. ಕಾರ್ಯಕ್ರಮದ ಸಂಘಟಕರು ಕಾರ್ಯಕ್ರಮಗಳನ್ನು ಕನ್ನಡ ಭವನದ ಸಹಯೋಗದಲ್ಲಿ ಹಾಕಿಕೊಂಡಿದ್ದೆ ಆದಲ್ಲಿ ಶುಲ್ಕದ ಪ್ರಮಾಣ 50% ರಷ್ಟು ರಿಯಾಯಿತಿ ನೀಡಲಾಗುತ್ತಿದೆ, ಇಲ್ಲಿ ನಡೆಯುತ್ತಿರುವ ಕನ್ನಡಪರ ಕಾರ್ಯಕ್ರಮಗಳ ಧ್ವನಿಯನ್ನು ಅಡಗಿಸುವ ಪ್ರಯತ್ನವನ್ನು ನಮ್ಮವರೇ ನಮ್ಮ ಕನ್ನಡದವರೇ ಮಾಡಿದ್ದು ಅತ್ಯಂತ ದುಃಖದ ಸಂಗತಿ ಎಂದರು.
ಕನ್ನಡ ಸಾಹಿತ್ಯ ಪರಿಷತ್ತಿನ ಮಾಜಿ ಜಿಲ್ಲಾಧ್ಯಕ್ಷರಾದ ಹಿರಿಯ ಸಾಹಿತಿ ಬಸವರಾಜ್ ಜಗಜಂಪಿ ಮಾತನಾಡಿ, ಪಾಟೀಲ್ ಪುಟ್ಟಪ್ಪನವರ ಅಧ್ಯಕ್ಷತೆಯ 2003ರ ಕನ್ನಡ ಸಾಹಿತ್ಯ ಸಮ್ಮೇಳನ ಸಂದರ್ಭದಲ್ಲಿ ಖರ್ಚೆಲ್ಲ ಕಳೆದು ಉಳಿದ ನಿಧಿಯನ್ನು ಮೂಲ ಧನವನ್ನಾಗಿಟ್ಟುಕೊಂಡು ಪ್ರಭಾಕರ್ ಕೋರೆಯವರ ಹಲವು ವರ್ಷಗಳ ಸತತ ಪ್ರಯತ್ನದಿಂದ ಸರ್ಕಾರದ ಅನುದಾನವನ್ನು ಪಡೆಯಲಾಗಿದೆ. ಇದರೊಂದಿಗೆ ಮತ್ತೂ ಕೆಲವು ಗಣ್ಯರು ಸಹಾಯ ಮಾಡಿದ್ದಾರೆ. ಹೀಗೆ ಕೇವಲ ಸರ್ಕಾರದ ಅನುದಾನದಿಂದ ಮಾತ್ರ ಅಲ್ಲ. ಬಹಳಷ್ಟು ಜನರ ಸಹಾಯ ಸಹಕಾರ ಮತ್ತು ಪರಿಶ್ರಮದಿಂದ ಈ ಭವನ ನಿರ್ಮಾಣವಾಗಿದೆ.
ಕರ್ನಾಟಕ ಗಡಿ ಅಭಿವೃದ್ಧಿ ಪ್ರಾಧಿಕಾರದ ಸಂಖ್ಯೆ 17-01-2019-20 ರ ದಿನಾಂಕ: 15-04-2023 ಆದೇಶದ ಪ್ರಕಾರ ಕನ್ನಡ ಭವನದ ನಿರ್ವಹಣೆ ಮತ್ತು ಉಸ್ತುವಾರಿಗಾಗಿ ನಾಗನೂರು ರುದ್ರಾಕ್ಷಿ ಮಠದ ಪೀಠಾಧಿಕಾರಿ ಡಾ. ಅಲ್ಲಮಪ್ರಭು ಮಹಾಸ್ವಾಮಿಗಳು ಗೌರವಾಧ್ಯಕ್ಷರಾಗಿರುವ, ಡಾ.ಪ್ರಭಾಕರ್ ಕೋರೆ ಅಧ್ಯಕ್ಷರಾಗಿರುವ 16 ಜನರ ಸಮಿತಿಯನ್ನು ನೇಮಕ ಮಾಡಲಾಗಿದೆ. ಎಲ್ಲವನ್ನೂ ಕಾನೂನು ಪ್ರಕಾರ ಕ್ರಮಬದ್ಧವಾಗಿ ಮಾಡಲಾಗಿದೆ, ಇಲ್ಲಿ ಯಾರೂ ಮೀಟಿಂಗ್ ಭತ್ತೆ ಪಡೆಯುವುದಿಲ್ಲ, ನಿಯಮಗಳ ಅನುಸಾರ ಆಡಿಟ್ ಕೂಡ ನಡೆಯುತ್ತದೆ ಎಂದವರು ವಿವರಿಸಿದರಲ್ಲದೆ, ಜಿಲ್ಲಾಡಳಿತದ ಈ ಕ್ರಮ ಸೂಕ್ತವಾದುದಲ್ಲ ಎಂದು ಅಸಮಾಧಾನ ಹೊರ ಹಾಕಿದರು.
ಕನ್ನಡ ಭವನದ ಕಾರ್ಯದರ್ಶಿ ನಿವೃತ್ತ ತಹಶೀಲ್ದಾರ್ ಯ.ರು. ಪಾಟೀಲ್ ಮಾತನಾಡಿ, ಭವನವನ್ನು ಸೀಜ್ ಮಾಡಿದ್ದು ಅಕ್ರಮ. ಈ ಕುರಿತು ಮುಂಚಿತವಾಗಿ ಯಾವುದೇ ರೀತಿಯ ನೋಟಿಸ್ ಕೊಟ್ಟಿಲ್ಲ, ಕಾರಣವನ್ನು ತಿಳಿಸಿಲ್ಲ, ಯಾವುದೇ ಜಿಲ್ಲೆಯ ಕನ್ನಡ ಸಾಹಿತ್ಯ ಪರಿಷತ್ತಿನ ಕಟ್ಟಡಗಳು ಸರ್ಕಾರದ ವಶದಲ್ಲಿ ಇಲ್ಲ. ಅವೆಲ್ಲವೂ ಕನ್ನಡ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕಗಳ ಉಸ್ತುವಾರಿಯಲ್ಲಿಯೇ ಇವೆ. ಇಲ್ಲಿ ಮಾತ್ರ ಏಕೆ ಈ ಕ್ರಮ ಕೈಗೊಳ್ಳಲಾಯಿತು ಗೊತ್ತಿಲ್ಲ, ನಿಯಮಗಳನ್ನು ಮೀರಿ ಏನೂ ಮಾಡಿಲ್ಲ. ಕೆಲವರಿಂದ ಅಪಪ್ರಚಾರ ಪ್ರಚಾರ ನಡೆದಿದೆ. ಬೆಳಗಾವಿಯಲ್ಲಿ ಕನ್ನಡಪರ ಚಟುವಟಿಗಳಿಕೆಗೆ ಅಡ್ಡಿಪಡಿಸುವ ಪ್ರಯತ್ನ ಸರಿಯಲ್ಲ ಎಂದು ಹೇಳಿದರು.
ಪತ್ರಿಕಾ ಪರಿಷತ್ತಿನಲ್ಲಿ ಕನ್ನಡ ಭವನ ಉಸ್ತುವಾರಿ ಸಮಿತಿ ನಿರ್ದೇಶಕರಾದ ರತ್ನಪ್ರಭಾ ಬೆಲ್ಲದ, ಹೇಮಾವತಿ ಸೋನೋಳಿ, ಇತರರಾದ ಎಂ ವೈ ಮೆಣಸಿನಕಾಯಿ, ಹಂಜಿ, ಮಹೇಶ್ ಗುರುನಗೌಡರ, ಹಂಜಿ ಮತ್ತು ಅವಲಕ್ಕಿ ಮುಂತಾದವರು ಉಪಸ್ಥಿತರಿದ್ದರು.
