*ದಿನಕ್ಕೆ 60 ಸಿಗರೇಟ್ ಸೇದುತ್ತಿದ್ದ ನಾನಾ ಪಾಟೇಕರ್*: *ಒಂದೇ ದಿನ ಧೂಮಪಾನಕ್ಕೆ ಗುಡ್‌ಬೈ ಹೇಳಿದ ನಟ*

ಪ್ರಗತಿವಾಹಿನಿ ಸುದ್ದಿ: ವಿಭಿನ್ನ ಅಭಿನಯ, ಖಡಕ್ ಡೈಲಾಗ್ ಹಾಗೂ ಗಂಭೀರ ಪಾತ್ರಗಳ ಮೂಲಕ ಗುರುತಿಸಿಕೊಂಡಿರುವ ಹಿರಿಯ ನಟ ನಾನಾ ಪಾಟೇಕರ್ ಒಂದು ಕಾಲದಲ್ಲಿ ದಿನಕ್ಕೆ ಬರೋಬ್ಬರಿ 60 ಸಿಗರೇಟ್ ಸೇದುತ್ತಿದ್ದರಂತೆ. 56ನೇ ವಯಸ್ಸಿನವರೆಗೂ ಮುಂದುವರಿದಿದ್ದ ಈ ಅಭ್ಯಾಸಕ್ಕೆ ಒಂದೇ ದಿನ ಏಕಾಏಕಿ ವಿದಾಯ ಹೇಳಿದ ಕಥೆ ಇದೀಗ ಮತ್ತೆ ಗಮನ ಸೆಳೆದಿದೆ.

‘ಅಂಕುಶ್’, ‘ಕ್ರಾಂತಿವೀರ್’, ‘ತಿರಂಗಾ’, ‘ವೆಲ್‌ಕಮ್’, ‘ಟ್ಯಾಕ್ಸಿ ನಂಬರ್ 9211’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಗಮನ ಸೆಳೆದಿರುವ ನಾನಾ ಪಾಟೇಕರ್, ತಮ್ಮ ವೈಯಕ್ತಿಕ ಬದುಕಿನ ಹಲವು ವಿಚಾರಗಳನ್ನೂ ಸಂದರ್ಶನಗಳಲ್ಲಿ ಹಂಚಿಕೊಂಡಿದ್ದಾರೆ. ಧೂಮಪಾನದ ಚಟ ಕೂಡ ಇದರಲ್ಲಿ ಒಂದಾಗಿತ್ತು.

ತಾವು ದಿನಕ್ಕೆ 60 ಸಿಗರೇಟ್ ಸೇದುತ್ತಿದ್ದೆ ಎಂದು 2012ರಲ್ಲಿ ನೀಡಿದ್ದ ಸಂದರ್ಶನದಲ್ಲಿ ನಾನಾ ಪಾಟೇಕರ್ ಹೇಳಿಕೊಂಡಿದ್ದರು. 2007-08ರ ಅವಧಿಯಲ್ಲಿ ಧೂಮಪಾನ ತ್ಯಜಿಸಿದ್ದಾಗಿ ತಿಳಿಸಿದ್ದ ನಟ, ಅದಕ್ಕಾಗಿ ಯಾವುದೇ ದೊಡ್ಡ ಯೋಜನೆ ಅಥವಾ ಹಂತ ಹಂತದ ಪ್ರಯತ್ನ ಮಾಡಿರಲಿಲ್ಲ ಎಂದಿದ್ದರು.

ಒಂದೇ ದಿನ ಸಿಗರೇಟ್‌ಗಳನ್ನು ಎಸೆದು ಧೂಮಪಾನಕ್ಕೆ ವಿದಾಯ ಹೇಳಿದ್ದಾಗಿ ನಾನಾ ಪಾಟೇಕರ್ ವಿವರಿಸಿದ್ದರು. 56ನೇ ವಯಸ್ಸಿನವರೆಗೂ ಚೈನ್ ಸ್ಮೋಕರ್ ಆಗಿದ್ದ ವ್ಯಕ್ತಿ ಏಕಾಏಕಿ ಈ ಅಭ್ಯಾಸದಿಂದ ಹೊರಬಂದಿದ್ದು ಅನೇಕರಿಗೆ ಅಚ್ಚರಿ ಮೂಡಿಸಿತ್ತು.

ಧೂಮಪಾನ ತ್ಯಜಿಸುವ ನಿರ್ಧಾರದ ಹಿಂದೆ ಭಾವನಾತ್ಮಕ ಘಟನೆಯೊಂದೂ ಇತ್ತು ಎಂದು  ಸಂದರ್ಶನದಲ್ಲಿ ನಾನಾ ಪಾಟೇಕರ್ ಹೇಳಿಕೊಂಡಿದ್ದರು. ಸ್ನೇಹಿತರೊಬ್ಬರ ಪತ್ನಿಯನ್ನು ಸಹೋದರಿಯಂತೆ ನೋಡುತ್ತಿದ್ದ ನಾನಾ ಪಾಟೇಕರ್, ಆಕೆಯ ಏಕೈಕ ಪುತ್ರ ಮೃತಪಟ್ಟ ಸಂದರ್ಭದಲ್ಲಿ ಆಕೆಯ ನೋವನ್ನು ಕಂಡಿದ್ದರು.

ಆ ಸಮಯದಲ್ಲಿ ನಾನಾ ಪಾಟೇಕರ್ ಕೆಮ್ಮುತ್ತಿದ್ದರು. ಆಗ ಆ ಮಹಿಳೆ ಕೇಳಿದ ಒಂದು ಪ್ರಶ್ನೆ ಮನಸ್ಸಿನಲ್ಲಿ ಆಳವಾಗಿ ಉಳಿಯಿತು. ‘ನಾನು ಇನ್ನೂ ಏನೇನು ನೋಡಬೇಕಿದೆ?’ ಎಂಬ ಪ್ರಶ್ನೆ ತಮ್ಮ ಆರೋಗ್ಯದ ಬಗ್ಗೆ ಗಂಭೀರವಾಗಿ ಯೋಚಿಸುವಂತೆ ಮಾಡಿತು ಎಂದು ನಾನಾ ಪಾಟೇಕರ್ ತಿಳಿಸಿದ್ದರು.

ಆ ಘಟನೆಯ ಬಳಿಕ ಸಿಗರೇಟ್‌ಗಳನ್ನು ಎಸೆದು ಧೂಮಪಾನ ತ್ಯಜಿಸಿದ್ದಾಗಿ ಹೇಳಿಕೊಂಡಿದ್ದರು. ನಂತರ ಇದೇ ವಿಚಾರದಲ್ಲಿ ಇತರರಿಗೂ ಸಲಹೆ ನೀಡಲು ಆರಂಭಿಸಿದ್ದರು. ‘ಕಮಾಲ್ ಧಮಾಲ್ ಮಾಲಮಾಲ್’ ಚಿತ್ರದ ಕೆಲಸದ ವೇಳೆ ನಿರ್ದೇಶಕ ಪ್ರಿಯದರ್ಶನ್ ಅವರಿಗೂ ಧೂಮಪಾನ ತ್ಯಜಿಸುವಂತೆ ನಾನಾ ಪಾಟೇಕರ್ ಸಲಹೆ ನೀಡಿದ್ದರು. ‘ಧೂಮಪಾನ ನಿಮ್ಮನ್ನು ಕೊಲ್ಲುತ್ತದೆ’ ಎಂದು ಎಚ್ಚರಿಕೆ ನೀಡಿದ್ದಾಗಿ ಪ್ರಿಯದರ್ಶನ್ ಹೇಳಿಕೊಂಡಿದ್ದಾರೆ.

ಆಮೀರ್ ಖಾನ್ ಜೊತೆಗಿನ ಸಂಭಾಷಣೆಯಲ್ಲೂ ಧೂಮಪಾನ ಮತ್ತು ಮದ್ಯಪಾನದ ವಿಚಾರ ಪ್ರಸ್ತಾಪವಾಗಿತ್ತು. ಅಭ್ಯಾಸ ಯಾವುದೇ ಮಿತಿಯನ್ನು ಮೀರಿದಾಗ ಆರೋಗ್ಯಕ್ಕೆ ಹಾನಿಕಾರಕವಾಗುತ್ತದೆ ಎಂದು ನಾನಾ ಪಾಟೇಕರ್ ತಿಳಿಸಿದ್ದರು.

ನಂತರ ಜೀವನಶೈಲಿಯಲ್ಲಿ ಹಲವು ಬದಲಾವಣೆ ಮಾಡಿಕೊಂಡ ನಾನಾ ಪಾಟೇಕರ್ ಫಿಟ್‌ನೆಸ್‌ಗೂ ಆದ್ಯತೆ ನೀಡಿದ್ದರು. 70ರ ಹರೆಯ ದಾಟಿದ ಬಳಿಕವೂ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುತ್ತಿದ್ದ ನಾನಾ ಪಾಟೇಕರ್, ಒಂದು ಕಾಲದ ಭಾರೀ ಧೂಮಪಾನದ ಅಭ್ಯಾಸದಿಂದ ಸಂಪೂರ್ಣವಾಗಿ ಹೊರಬಂದಿದ್ದರು.

ಮೂರು ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಗಳು, ಎರಡು ಮಹಾರಾಷ್ಟ್ರ ರಾಜ್ಯ ಚಲನಚಿತ್ರ ಪ್ರಶಸ್ತಿಗಳು ಹಾಗೂ ನಾಲ್ಕು ಫಿಲ್ಮ್‌ಫೇರ್ ಪ್ರಶಸ್ತಿಗಳನ್ನು ಪಡೆದಿರುವ ನಾನಾ ಪಾಟೇಕರ್, ನಟನೆಯ ಜೊತೆಗೆ ನಿರ್ದೇಶಕರಾಗಿಯೂ ಗುರುತಿಸಿಕೊಂಡಿದ್ದಾರೆ. 2013ರಲ್ಲಿ ಸಿನಿಮಾ ಮತ್ತು ಕಲಾ ಕ್ಷೇತ್ರಕ್ಕೆ ನೀಡಿದ ಕೊಡುಗೆಗಾಗಿ ಪದ್ಮಶ್ರೀ ಪ್ರಶಸ್ತಿಯೂ ಲಭಿಸಿದೆ.