*ಇಸ್ರೇಲ್ ಚುನಾವಣೆ*: *ಯಾರಿಗೆ ಅಧಿಕಾರ? ನೆತನ್ಯಾಹು, ಐಸೆನ್‌ಕೋಟ್ ನಡುವೆ ತೀವ್ರ ಪೈಪೋಟಿ!*

ಪ್ರಗತಿವಾಹಿನಿ ಸುದ್ದಿ: ಇಸ್ರೇಲ್‌ನ ಮಹತ್ವದ ಚುನಾವಣೆಯಲ್ಲಿ ಯಾರಿಗೂ ಸ್ಪಷ್ಟ ಬಹುಮತ ಸಿಗದಿರುವ ಸಾಧ್ಯತೆ ಹೆಚ್ಚಾಗಿದೆ. ಮಂಗಳವಾರ ಮುಕ್ತಾಯಗೊಂಡ ಮತದಾನದ ಬಳಿಕ ಬಿಡುಗಡೆಯಾದ ಚುನಾವಣೋತ್ತರ ಸಮೀಕ್ಷೆಗಳು ಈ ಸುಳಿವು ನೀಡಿವೆ. ಮಾಜಿ ಸೇನಾ ಮುಖ್ಯಸ್ಥ ಗಾಡಿ ಐಸೆನ್‌ಕೋಟ್ ನೇತೃತ್ವದ ಯಾಶರ್ ಮೈತ್ರಿಕೂಟ ಮತ್ತು ಬೆಂಜಮಿನ್ ನೆತನ್ಯಾಹು ನೇತೃತ್ವದ ಲಿಕುಡ್ ಮೈತ್ರಿಕೂಟದ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿದೆ.

ಕಾನ್ 11 ಮತ್ತು ಚಾನೆಲ್ 13 ನಡೆಸಿದ ಚುನಾವಣೋತ್ತರ ಸಮೀಕ್ಷೆಗಳ ಪ್ರಕಾರ, ಎರಡೂ ಪ್ರಮುಖ ಮೈತ್ರಿಕೂಟಗಳು ಸಮಬಲ ಸಾಧಿಸುವ ನಿರೀಕ್ಷೆಯಿದೆ. ಚಾನೆಲ್ 12ರ ಸಮೀಕ್ಷೆಯಲ್ಲಿ ನೆತನ್ಯಾಹು ನೇತೃತ್ವದ ಲಿಕುಡ್ ಮೈತ್ರಿಕೂಟಕ್ಕೆ ಅಲ್ಪ ಮುನ್ನಡೆ ಸಿಕ್ಕಿದೆ. ಆದರೆ, 120 ಸದಸ್ಯ ಬಲದ ಇಸ್ರೇಲ್ ಸಂಸತ್‌ನಲ್ಲಿ ಸರ್ಕಾರ ರಚಿಸಲು ಅಗತ್ಯವಿರುವ 61 ಸ್ಥಾನಗಳನ್ನು ಪಡೆಯುವುದು ಎರಡೂ ಬಣಗಳಿಗೆ ಕಠಿಣವಾಗಲಿದೆ ಎಂದು ಸಮೀಕ್ಷೆಗಳು ಸೂಚಿಸಿವೆ.

ಈ ನಡುವೆ, ಪ್ರಮುಖ ಮೈತ್ರಿಕೂಟಗಳ ಹೊರಗಿರುವ ಅರಬ್ ಪಕ್ಷಗಳು ಸರ್ಕಾರ ರಚನೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ಸಾಧ್ಯತೆಯಿದೆ. ಆದರೆ, ಅರಬ್ ಪಕ್ಷಗಳ ಬೆಂಬಲದೊಂದಿಗೆ ಸರ್ಕಾರ ರಚಿಸುವುದಿಲ್ಲ ಎಂದು ಐಸೆನ್‌ಕೋಟ್ ಘೋಷಿಸಿದ್ದಾರೆ. ಹೀಗಾಗಿ ಬಹುಮತ ಸಾಬೀತುಪಡಿಸುವುದು ಮತ್ತು ಹೊಸ ಸರ್ಕಾರ ರಚಿಸುವುದು ಎರಡೂ ಬಣಗಳಿಗೆ ಸವಾಲಾಗುವ ಸಾಧ್ಯತೆಯಿದೆ.

ಮತದಾನ ಮುಗಿದ ಬಳಿಕ ಜೆರುಸಲೇಮ್‌ನಲ್ಲಿ ಲಿಕುಡ್ ಪಕ್ಷದ ಬೆಂಬಲಿಗರನ್ನು ಉದ್ದೇಶಿಸಿ ಮಾತನಾಡಿದ ಬೆಂಜಮಿನ್ ನೆತನ್ಯಾಹು, ಬಲಿಷ್ಠ ಬಲಪಂಥೀಯ ಸರ್ಕಾರ ರಚಿಸುವ ಅಗತ್ಯವನ್ನು ಒತ್ತಿಹೇಳಿದರು. ಇಸ್ರೇಲ್‌ನ ಸೇನಾ ಸಾಧನೆಗಳನ್ನು ಉಲ್ಲೇಖಿಸಿದ ಅವರು, ಇರಾನ್‌ನ ಬೆದರಿಕೆಯನ್ನು ಹಿಮ್ಮೆಟ್ಟಿಸಲು ಇದು ಐತಿಹಾಸಿಕ ಅವಕಾಶ ಎಂದು ಅಭಿಪ್ರಾಯಪಟ್ಟರು.

ಇಸ್ರೇಲ್‌ನ ಕೇಂದ್ರ ಚುನಾವಣಾ ಸಮಿತಿಯ ಪ್ರಕಾರ, ಈ ಬಾರಿ ಶೇ.77.7ರಷ್ಟು ಮತದಾನ ದಾಖಲಾಗಿದೆ. ಇದು 1973ರ ಬಳಿಕದ ಅತ್ಯಧಿಕ ಮತದಾನ ಪ್ರಮಾಣವೆಂದು ವರದಿಯಾಗಿದೆ. 2022ರ ಚುನಾವಣೆಗೆ ಹೋಲಿಸಿದರೆ ಮತದಾನದಲ್ಲಿ ಸುಮಾರು ಶೇ.7ರಷ್ಟು ಏರಿಕೆ ಕಂಡುಬಂದಿದೆ. ಈಗ ಎಲ್ಲರ ಗಮನ ಅಧಿಕೃತ ಫಲಿತಾಂಶದತ್ತ ನೆಟ್ಟಿದ್ದು, ಯಾವ ಬಣ ಸರ್ಕಾರ ರಚಿಸಲಿದೆ ಎಂಬ ಕುತೂಹಲ ಹೆಚ್ಚಾಗಿದೆ.