ಚರಂಡಿಯಲ್ಲಿ ಮುಳುಗಿದ ಮಗುವಿನ ಕಾಲು ಕಂಡು ಮೇಲೆತ್ತಿದ ತಾಯಿ

ಸೋಮವಾರ 6ನೇ ವಾರ್ಡ್ ನಿವಾಸಿ ಭಾರತಿ ಹಣಮಂತ ಕೆಳಗಡೆ ಎಂಬುವವರ 3ವರ್ಷದ ಮಗಳು ನೀಲಾಂಬರಿ ಆಟವಾಡಲೆಂದು ಮನೆಯ ಹೊರಗಡೆ ಬಂದಿದ್ದಾಳೆ. ಚರಂಡಿ ನೀರು ತುಂಬಿ ರಸ್ತೆಯ ಮೇಲೆಲ್ಲಾ ಹರಿಯುತ್ತಿತ್ತು. ರಸ್ತೆ ಯಾವುದು ಚರಂಡಿ ಯಾವುದು ಎಂದು ಕಾಣದೆ ಚರಂಡಿಗೆ ಉರುಳಿದ ಮಗುವಿನ ಕಾಲು ಮಾತ್ರ ಮೇಲೆ ಕಾಣುತಿತ್ತು. ಅಕಸ್ಮಾತ್ ಹೊರಗಡೆ ಬಂದ ಮಗುವಿನ ತಾಯಿ ಭಾರತಿ ಚರಂಡಿಯಲ್ಲಿ ಬಿದ್ದು ಜೀವನ್ಮರಣದ ಹೋರಾಟದಲ್ಲಿ ಓದ್ದಾಡುತಿದ್ದ ಮಗುವನ್ನು ಸ್ಥಳೀಯರ ಸಹಕಾರದಿಂದ ಚರಂಡಿಯಿಂದ ಮೇಲೆತ್ತಿದರು.  ಕಿವಿಯಲ್ಲಿ ಊದಿ, ಕೈ ಕಾಲನ್ನು ತಿಕ್ಕಿದಾಗ ಮಗುವಿನ ಜೀವ ಮರಳಿ ಬಂದಿದೆ.

ಸಾವಿನ ದವಡೆಯಿಂದ ಪಾರಾದ ತನ್ನ ಮಗಳನ್ನು ಟವೆಲ್ ಹಾಕಿಕೊಂಡು ಸ್ಥಳೀಯ ಮಹಿಳೆಯರ ಸಮೇತ ಪುರಸಭೆಗೆ ಆಗಮಿಸಿ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

2ದಿನಗಳಲ್ಲಿ ಸಮಸ್ಯೆ ಬಗೆ ಹರಿಯದೇ ಹೋದಲ್ಲಿ ಖುದ್ದಾಗಿ ನಾವೇ ಚರಂಡಿಗೆ ಕಲ್ಲು ಹಾಕಿ ಮುಚ್ಚುತ್ತೇವೆ ಎಂದು ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದ್ದಾರೆ.

” ನನ್ನ ಮಕ್ಕಳು ಆಟವಾಡಲು ಹೋಗಿ ಪ್ರಾಣ ಕಳೆದುಕೊಳ್ಳುತ್ತಿರುವುದು. ಇದು 2ನೇ ಬಾರಿ.

 ನಾನು ಹೊರಗಡೆ ಬಂದು ನೋಡದೆ ಹೋಗಿದ್ದರೆ ನನ್ನ ಮಗಳು ಶವವಾಗಿ ಹೋಗುತ್ತಿದ್ದಳು. ಪ್ರತಿನಿತ್ಯ ಚರಂಡಿ ನೀರು ಹೊಳೆಯ ಆಕಾರದಲ್ಲಿ ಹರಿದು ಬರುತ್ತದೆ. ಅದರಲ್ಲಿ ಸೂಜಿ, ಸಲಾಯಿನ್ ಸೇರಿದಂತೆ ಹಾನಿಕಾರಕ ವಸ್ತುಗಳು ಹರಿದು ಬರುತ್ತಲೇ ಇರುತ್ತವೆ. ನಮ್ಮ ಮಕ್ಕಳ ಪ್ರಾಣಕ್ಕೆ ಬೆಲೆನೇ ಇಲ್ವಾ” ಎಂದು ಭಾರತಿ ಹಣಮಂತ ಕೆಳಗಡೆ ಪ್ರಶ್ನಿಸುತ್ತಾರೆ.