ಕೈ ನಾಯಕರೇ ಡಿಕೆಶಿ ಮುಳುಗಿಸಲಿದ್ದಾರೆ ಎಂದ ಬಿಜೆಪಿ ರಾಜ್ಯಾಧ್ಯಕ್ಷ

ಪ್ರಗತಿವಾಹಿನಿ ಸುದ್ದಿ; ಬೆಂಗಳೂರು: ಕೆಪಿಸಿಸಿ ಅಧ್ಯಕ್ಷ ಡಿ.ಕೆ ಶಿವಕುಮಾರ್​​ ಅವರನ್ನು ಕಾಂಗ್ರೆಸ್​ ನಾಯಕರೇ ಮುಳುಗಿಸಲಿದ್ದಾರೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್​​ ಕುಮಾರ್​ ಕಟೀಲ್​​​​ ಹೇಳಿದ್ದಾರೆ.

ಬಿಜೆಪಿ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತಾಡಿದ ನಳಿನ್​ ಕುಮಾರ್​​ ಕಟೀಲ್​​, ಡಿ.ಕೆ ಶಿವಕುಮಾರ್​​ ಪದಗ್ರಹಣ ಕಾರ್ಯಕ್ರಮ ಆರಂಭಿಕ ಶೂರತ್ವ ಅಷ್ಟೇ. ಡಿಕೆಶಿ ಹೇಳಿರುವ ಬಿಜೆಪಿ ಮುಕ್ತ ಆಗಲ್ಲ, ಬದಲಾಗಿ ಡಿಕೆಶಿ ಮುಕ್ತ ಕಾಂಗ್ರೆಸ್ ಆಗಲಿದೆ ಎಂದರು.

​​ಕಾಂಗ್ರೆಸ್​ ವ್ಯಕ್ತಿಕೇಂದ್ರಿತ ಪಕ್ಷ. ಮುಳುಗುವ ಹಡಗನ್ನು ಡಿಕೆಶಿ ಹತ್ತಿದ್ದಾರೆ. ಮುಂದೆ ಎಲ್ಲಾ ಕಾಂಗ್ರೆಸ್​ ನಾಯಕರು ಸೇರಿಕೊಂಡು ಡಿ.ಕೆ ಶಿವಕುಮಾರ್​​ ಅವರನ್ನು ಮುಳುಗಿಸುತ್ತಾರೆ ನೋಡುತ್ತಿರಿ ಎಂದು ತಿಳಿಸಿದರು.

ಇನ್ನು ನಮ್ಮ ಸಚಿವರಲ್ಲಿ ಯಾವುದೇ ಭಿನ್ನಾಭಿಪ್ರಾಯ, ಗೊಂದಲಗಳೂ ಇಲ್ಲ. ಮುಖ್ಯಮಂತ್ರಿ ಬಿ.ಎಸ್​ ಯಡಿಯೂರಪ್ಪ ನೇತೃತ್ವದಲ್ಲೇ ಕೋವಿಡ್​-19 ನಿರ್ವಹಣೆ ಮಾಡಲಾಗುತ್ತಿದೆ. ಆರ್​​. ಅಶೋಕ್​​ ಅವರೇ ಬೆಂಗಳೂರಿನಲ್ಲಿ ಕೊರೋನಾ ಪರಿಸ್ಥಿತಿ ನಿಭಾಯಿಸುವ ಹೊಣೆ ಹೊತ್ತುಕೊಂಡಿದ್ದಾರೆ. ಎಲ್ಲರೂ ಯಡಿಯೂರಪ್ಪ ನೇತೃತ್ವದಲ್ಲೇ ಕೊರೊನಾ ಪರಿಸ್ಥಿತಿ ನಿರ್ವಹಣೆ ಮಾಡುತ್ತಿದ್ದಾರೆ ಎಂದರು.