ಪ್ರಗತಿವಾಹಿನಿ ಸುದ್ದಿ, ಬೆಳಗಾವಿ
ನಗರದ ಜಿಲ್ಲಾ ಕ್ರೀಡಾಂಗಣದಲ್ಲಿ ಗುರುವಾರದಿಂದ ಆರಂಭಗೊಂಡಿರುವ ಕರ್ನಾಟಕ ಕುಸ್ತಿ ಹಬ್ಬದಲ್ಲಿ ರಾಜ್ಯ ಮಟ್ಟದ ಕುಸ್ತಿ ಸ್ಪರ್ಧೆಗಳು ಭರದಿಂದ ನಡೆಯುತ್ತಿದ್ದು, ಫೆ.೧೦ ಭಾನುವಾರದಂದು ರಾಷ್ಟ್ರ ಮತ್ತು ಅಂತಾರಾಷ್ಟ್ರೀಯ ಕುಸ್ತಿ ಪಟುಗಳಿಂದ ಜಂಗಿ ಕುಸ್ತಿ ಪ್ರದರ್ಶನ ನಡೆಯಲಿದೆ.
ಅಂದು ಅಂತರಾಷ್ಟ್ರೀಯ ಕುಸ್ತಿ ಪಟು ಜಾರ್ಜಿಯಾ ದೇಶದ ಪೈಲ್ವಾನ್ ಇಬಾನೈಡಿಜ್ ಟೆಡೊರ್ ಮತ್ತು ಕಾಮನ್‌ವೆಲ್ಥ್ ಪದಕ ಮತ್ತು ೧೪ ಬಾರಿ ಭಾರತ ಕೇಸರಿ ವಿಜೇತ ಹರಿಯಾಣದ ಪೈಲ್ವಾನ್ ಮೌಸಮ್ ಖತ್ರಿ ಹಾಗೂ ಜಾರ್ಜಿಯಾದ ಪೈಲ್ವಾನ್ ಮಾಮುಕಾ ಕೋರ್ಡ್ಜಾಲಾ ಮತ್ತು ಪಂಜಾಬ್ ಪೈಲ್ವಾನ್ ಗೌರವ ಸಿಂಗ್ ನಡುವೆ ವಿಶ್ವ ಮಲ್ಲಯುದ್ಧ ನಡೆಯಲಿದೆ.
ಅಜರ್‌ಬೈಜಾನ್ ದೇಶದ ಅಂತರಾಷ್ಟ್ರೀಯ ಮಹಿಳಾ ಕುಸ್ತಿ ಪಟು ಪೈಲ್ವಾನ್ ಅಲಿಯಾನಾ ಕೊಲೆಸ್ನಿಕ್ ಅವರು ರಾಷ್ಟ್ರೀಯ ಚಾಂಪಿಯನ್ ಆದ ಹರಿಯಾಣದ ಪೈಲ್ವಾನ ಪಿಂಕಿ ಅವರೊಂದಿಗೆ, ಅಜರ್‌ಬೈಜಾನ್‌ದ ಪೈಲ್ವಾನ್ ಜಯ್ಲಾ ನಾಗಿಸೇಡೆ ಮಧ್ಯೆ ಹರಿಯಾಣದ ರೀತೂ ಮಲ್ಲಿಕ್ ಮಧ್ಯೆ ಸೆಣಸಾಟ ನಡೆಯಲಿದೆ.
ಪುಣೆಯ ಪೈಲ್ವಾನ್ ವಿಷ್ಣು ಕೋಶೆ ಅವರು ದೆಹಲಿಯ ಪೈಲ್ವಾನ್ ಮಂಜೀತ್ ಖತ್ರಿ, ಕೊಲ್ಹಾಪುರದ ಪೈಲ್ವಾನ್ ಜ್ಞಾನೇಶ್ವರ ಮೌಲಿ ಅವರು ಅಂತರಾಷ್ಟ್ರೀಯ ಕುಸ್ತಿ ಪಟು ಹರಿಯಾಣದ ಪೈಲ್ವಾನ್ ಪ್ರವೀಣ ಬೋಲಾ, ಉತ್ತರ ಪ್ರದೇಶದ ಉಮೇಶ ಚೌಧರಿ ಜೊತೆ ಪಂಜಾಬಿನ ಪೈಲ್ವಾನ್ ಕವಲಜೀತ್, ಪೂನಾದ ಪೈಲ್ವಾನ್ ಸಾಗರ ಬಿರಾದಾರ ಜೊತೆ ಪಂಜಾಬಿನ ಪೈಲ್ವಾನ್ ಸುಖಚೆನ್ ಸಿಂಗ್, ಅಂತಾರಾಷ್ಟ್ರೀಯ ಕುಸ್ತಿಪಟು ಹರಿಯಾಣದ ಸುಮಿತಕುಮಾರ ಜೊತೆ ಕರ್ನಾಟಕ ಕೇಸರಿ ರಾಣಿಬೆನ್ನೂರಿನ ಪೈಲ್ವಾನ್ ಕಾರ್ತಿಕ್ ಕಾಟೆ, ರಾಷ್ಟ್ರೀಯ ಚಾಂಪಿಯನ್ ಮಧ್ಯಪ್ರದೇಶದ ರಾಣಿ ರಾಣಾ ಗ್ವಾಲಿಯರ್ ಜೊತೆ ಅಂತರಾಷ್ಟ್ರೀಯ ಪದಕ ವಿಜೇತೆ ಮಹಾರಾಷ್ಟ್ರದ ಪೈಲ್ವಾನ್ ಸ್ವಾತಿ ಶಿಂದೆ ಅವರು ಮಲ್ಲಯುದ್ಧ ನಡೆಸುವರು ಎಂದು ಜಿಲ್ಲಾಧಿಕಾರಿ ಎಸ್.ಬಿ.ಬೊಮ್ಮನಳ್ಳಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಪ್ರಗತಿವಾಹಿನಿ ಸುದ್ದಿಗಳನ್ನು ನಿಮ್ಮ ಸ್ನೇಹಿತರಿಗೆ, ಬೇರೆ ಗ್ರುಪ್ ಗಳಿಗೆ ಶೇರ್ ಮಾಡಿ
