*ಪ್ರೇಮಾನಂದ ಮಹಾರಾಜ್ ಶಿಷ್ಯನ ಸಾವು*: *ಮರಣೋತ್ತರ ಪರೀಕ್ಷೆಯಲ್ಲಿ ಶಾಕಿಂಗ್ ಮಾಹಿತಿ ಬಯಲು*

ಪ್ರಗತಿವಾಹಿನಿ ಸುದ್ದಿ: ಪ್ರೇಮಾನಂದ ಮಹಾರಾಜ್ ಅವರ ಶಿಷ್ಯ ದೀಪಕ್ ಲೋಧಿ ಅಲಿಯಾಸ್ ರಸಿಕ್ ದುಲಾರಿ ಅವರ ಮರಣೋತ್ತರ ಪರೀಕ್ಷೆಯಲ್ಲಿ ಹಲವು ಅಘಾತಕಾರಿ ಮಾಹಿತಿಗಳು ಬಯಲಾಗಿದೆ.  ರಸಿಕ್ ದುಲಾರಿ ಅವರ ದೇಹದಲ್ಲಿ ಹಲವು ಗಂಭೀರ ಗಾಯಗಳಾಗಿವೆ ಎಂದು ಪರೀಕ್ಷೆಯಲ್ಲಿ ತಿಳಿದುಬಂದಿದೆ.

ತಲೆಯಿಂದ ಎದೆ ಮತ್ತು ಪಕ್ಕೆಲುಬುಗಳವರೆಗೆ ಹಲವು ಗಾಯಗಳಾಗಿದ್ದು, ತೀವ್ರ ರಕ್ತಸ್ರಾವ ಅಥವಾ ರಕ್ತಸ್ರಾವದ ಆಘಾತವೇ ಸಾವಿಗೆ ಕಾರಣವಾಗಿರಬಹುದು ಎಂದು ಮರಣೋತ್ತರ ಪರೀಕ್ಷೆಯಲ್ಲಿ ಬಯಲಾಗಿದೆ

ಮೃತರನ್ನು ಮಥುರಾ ಜಿಲ್ಲೆಯ ವೃಂದಾವನ ಪೊಲೀಸ್ ಠಾಣೆ ವ್ಯಾಪ್ತಿಯ ಗುರು ಕೃಪಾ ಕುಂಜ್ ನಿವಾಸಿ ಛೇತ್ರಮ್ ಲೋಧಿ ಅವರ ಪುತ್ರ ದೀಪಕ್ ಕುಮಾರ್ ಎಂದು ಗುರುತಿಸಲಾಗಿದೆ. ಸನ್ಯಾಸಿಯಾಗಿ ವಾಸಿಸುತ್ತಿದ್ದ ದೀಪಕ್ ಅವರ ಮರಣೋತ್ತರ ಪರೀಕ್ಷೆ ಸೆ.26ರಂದು ಮಥುರಾದಲ್ಲಿ ನಡೆದಿದೆ.

ಮರಣೋತ್ತರ ಪರೀಕ್ಷೆಯಲ್ಲಿ ತಲೆಯ ಮೇಲೆ ಸುಮಾರು 14 ಹೊಲಿಗೆಗಳಿರುವ ಗಾಯ ಪತ್ತೆಯಾಗಿದೆ. ಆಕ್ಸಿಪಿಟಲ್ ಭಾಗದಲ್ಲಿ ಹೆಮಟೋಮಾ ಹಾಗೂ ತಲೆಬುರುಡೆಯಲ್ಲಿ ಹೇರ್‌ಲೈನ್ ಫ್ರ್ಯಾಕ್ಚರ್ ಕಂಡುಬಂದಿದೆ. ಮೆದುಳಿನಲ್ಲೂ ಹೆಮಟೋಮಾ ಪತ್ತೆಯಾಗಿದ್ದು, ಕೆಳ ತುಟಿ, ಗಲ್ಲ ಹಾಗೂ ದೇಹದ ಇತರ ಭಾಗಗಳಲ್ಲಿ ಗಾಯಗಳಾಗಿರುವುದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಪಾದದಲ್ಲೂ ಗಾಯವಿದ್ದು, ಆಂತರಿಕ ಮೂಳೆ ಮುರಿತ ಕಂಡುಬಂದಿದೆ ಎಂದು ಮೂಲಗಳು ತಿಳಿಸಿವೆ. ಎದೆಯ ಎಡಭಾಗದಲ್ಲಿ ಐದನೇಯಿಂದ ಎಂಟನೇ ಪಕ್ಕೆಲುಬುಗಳವರೆಗೆ ಮುರಿತವಾಗಿರುವುದು ಮರಣೋತ್ತರ ಪರೀಕ್ಷೆಯಲ್ಲಿ ದೃಢಪಟ್ಟಿದೆ.

ಇದರೊಂದಿಗೆ ಎಡ ಶ್ವಾಸಕೋಶಕ್ಕೆ ಹಾನಿಯಾಗಿರುವುದು ಪತ್ತೆಯಾಗಿದೆ. ಎರಡೂ ಶ್ವಾಸಕೋಶಗಳು ಬಣ್ಣ ಕಳೆದುಕೊಂಡಿದ್ದು, ಶ್ವಾಸಕೋಶದ ಸುತ್ತಲಿನ ಕುಳಿಯಲ್ಲಿ ರಕ್ತ ಕಂಡುಬಂದಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಕಿಬ್ಬೊಟ್ಟೆಯ ಕುಳಿಯಲ್ಲಿ ಸುಮಾರು 100 ಮಿಲಿಲೀಟರ್ ನೀರಿನಂತಹ ದ್ರವ ಕಂಡುಬಂದಿದೆ. ಯಕೃತ್ತು ಮಸುಕಾಗಿದ್ದು, ಪಿತ್ತಕೋಶ ತುಂಬಿರುವುದು ಕಂಡುಬಂದಿದೆ. ಹೃದಯದ ಎರಡೂ ಕೋಣೆಗಳು ಖಾಲಿಯಾಗಿದ್ದವು ಎಂದು ಮರಣೋತ್ತರ ಪರೀಕ್ಷೆಯ ವರದಿ ತಿಳಿಸಿದೆ. ಬೆನ್ನುಹುರಿಯನ್ನು ಪರೀಕ್ಷಿಸಲಾಗಿಲ್ಲ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಮರಣೋತ್ತರ ಪರೀಕ್ಷೆಯ ವರದಿಯಲ್ಲಿ ದೇಹದ ಒಂದು ಭಾಗ ಬೇರ್ಪಡಿಸಿರುವುದನ್ನೂ ದಾಖಲಿಸಲಾಗಿದೆ. ಪೊಲೀಸ್ ಅಧಿಕಾರಿ ಎಚ್‌ಸಿ 632 ಜಿತೇಂದ್ರ ಕುಮಾರ್ ಹಾಗೂ ಮೃತರ ಸಹೋದರ ಮನೀಶ್ ಪಟೇಲ್ ಮೃತದೇಹವನ್ನು ಗುರುತಿಸಿದ್ದಾರೆ. ಮರಣೋತ್ತರ ಪರೀಕ್ಷೆ ವೇಳೆ ವ್ಯಕ್ತಿ ಮೃತಪಟ್ಟಿದ್ದು ಸುಮಾರು ಒಂದು ದಿನವಾಗಿರಬಹುದು ಎಂದು ಅಂದಾಜಿಸಲಾಗಿದೆ.

ಪೊಲೀಸ್ ದಾಖಲೆಗಳ ಪ್ರಕಾರ ಸೆ.25ರಂದು ಜಿಡಿ ಸಂಖ್ಯೆ 049ರಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಮರಣೋತ್ತರ ಪರೀಕ್ಷೆಯಲ್ಲಿ ಪತ್ತೆಯಾಗಿರುವ ಗಾಯಗಳು ಸಾವಿಗೆ ಸಂಬಂಧಿಸಿದ ವೈದ್ಯಕೀಯ ಮಾಹಿತಿಯನ್ನು ಒದಗಿಸಿವೆ. ಗಾಯಗಳು ಯಾವ ಸಂದರ್ಭಗಳಲ್ಲಿ ಸಂಭವಿಸಿದವು ಮತ್ತು ಸಾವಿಗೆ ಕಾರಣವಾದ ಘಟನೆ ಏನು ಎಂಬುದನ್ನು ಪೊಲೀಸರು ತನಿಖೆ ನಡೆಸಬೇಕಿದೆ.

*ಸ್ವರ್ಣ ನದಿಯಲ್ಲಿ ದುರಂತ: ಈಜಲು ತೆರಳಿದ್ದ ಇಬ್ಬರು ಯುವಕರ ಸಾವು* – Pragati Vahini