ಪ್ರಗತಿವಾಹಿನಿ ಸುದ್ದಿ: ಲಂಡನ್‌ನಿಂದ ಚಿಕಾಗೋಗೆ ತೆರಳುತ್ತಿದ್ದ ಬ್ರಿಟಿಷ್ ಏರ್ವೇಸ್ ವಿಮಾನವೊಂದು ಐರ್ಲೆಂಡ್‌ ವಾಯುಪ್ರದೇಶದಲ್ಲಿದ್ದಾಗ ಏಕಾಏಕಿ ಭಾರಿ ಪ್ರಮಾಣದಲ್ಲಿ ಕೆಳಕ್ಕೆ ಇಳಿದ ಘಟನೆ ನಡೆದಿದೆ. ಸುಮಾರು 37 ಸಾವಿರ ಅಡಿ ಎತ್ತರದಲ್ಲಿ ಹಾರುತ್ತಿದ್ದ ವಿಮಾನ ಕೇವಲ ಒಂದು ನಿಮಿಷದಲ್ಲಿ 28 ಸಾವಿರ ಅಡಿ ಕುಸಿದು, ಸುಮಾರು 9 ಸಾವಿರ ಅಡಿ ಎತ್ತರಕ್ಕೆ ಇಳಿದಿದೆ.
ಬೋಯಿಂಗ್ 777-200ER ವಿಮಾನವಾಗಿರುವ BA295, ಲಂಡನ್ ಹೀಥ್ರೂ ವಿಮಾನ ನಿಲ್ದಾಣದ ಟರ್ಮಿನಲ್-5ರಿಂದ ಚಿಕಾಗೋದ ಓ’ಹೇರ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದತ್ತ ತೆರಳುತ್ತಿತ್ತು. ಟೇಕಾಫ್ ಆದ ಸುಮಾರು ಒಂದು ಗಂಟೆಯ ಬಳಿಕ ವಿಮಾನ 37 ಸಾವಿರ ಅಡಿ ಎತ್ತರದಲ್ಲಿ ಹಾರಾಟ ನಡೆಸುತ್ತಿದ್ದಾಗ ತುರ್ತು ಪರಿಸ್ಥಿತಿ ಎದುರಾಗಿದೆ.
ಘಟನೆ ವೇಳೆ ವಿಮಾನದಿಂದ ‘7700’ ಎಮರ್ಜೆನ್ಸಿ ಸ್ಕ್ವಾಕ್ ಕೋಡ್ ಸಕ್ರಿಯಗೊಳಿಸಲಾಗಿದೆ ಎಂದು ವರದಿಯಾಗಿದೆ. ವಿಮಾನ ಏಕಾಏಕಿ ಭಾರಿ ಪ್ರಮಾಣದಲ್ಲಿ ಕೆಳಕ್ಕೆ ಇಳಿದಿದ್ದರಿಂದ ಪ್ರಯಾಣಿಕರು ಹಾಗೂ ಸಿಬ್ಬಂದಿಯಲ್ಲಿ ಆತಂಕದ ವಾತಾವರಣ ನಿರ್ಮಾಣವಾಗಿತ್ತು.
7700 ಕೋಡ್ ಸಕ್ರಿಯಗೊಳಿಸಿದ ಬಳಿಕ ವಿಮಾನ ತನ್ನ ಪ್ರಯಾಣವನ್ನು ಮುಂದುವರಿಸದೆ ಲಂಡನ್ ಹೀಥ್ರೂ ವಿಮಾನ ನಿಲ್ದಾಣದತ್ತ ವಾಪಸ್ ತೆರಳಿದೆ. ವಿಮಾನದಲ್ಲಿ ನಿಖರವಾಗಿ ಯಾವ ರೀತಿಯ ತುರ್ತು ಪರಿಸ್ಥಿತಿ ಎದುರಾಗಿತ್ತು ಎಂಬುದು ತಕ್ಷಣಕ್ಕೆ ಸ್ಪಷ್ಟವಾಗಿಲ್ಲ.
ಘಟನೆಗೆ ಕಾರಣವೇನು ಎಂಬುದರ ಕುರಿತು ಸದ್ಯ ಯಾವುದೇ ಅಧಿಕೃತ ಸ್ಪಷ್ಟನೆ ಲಭ್ಯವಾಗಿಲ್ಲ. ತಾಂತ್ರಿಕ ದೋಷ, ವೈದ್ಯಕೀಯ ತುರ್ತು ಪರಿಸ್ಥಿತಿ ಅಥವಾ ಇತರ ಕಾರಣಗಳ ಸಾಧ್ಯತೆಗಳ ಬಗ್ಗೆ ತನಿಖೆ ಹಾಗೂ ಪರಿಶೀಲನೆಯ ಬಳಿಕವಷ್ಟೇ ನಿಖರ ಮಾಹಿತಿ ಹೊರಬರಬೇಕಿದೆ.
ಏನಿದು 7700 ಕೋಡ್?
‘7700’ ಎಂಬುದು ವಿಮಾನಯಾನದಲ್ಲಿ ಸಾಮಾನ್ಯ ತುರ್ತು ಪರಿಸ್ಥಿತಿಯನ್ನು ಸೂಚಿಸುವ ಪ್ರಮಾಣಿತ ಟ್ರಾನ್ಸ್‌ಪಾಂಡರ್ ಕೋಡ್. ಪೈಲಟ್‌ಗಳು ಈ ಕೋಡ್ ಸಕ್ರಿಯಗೊಳಿಸಿದಾಗ ವಿಮಾನಕ್ಕೆ ತುರ್ತು ನೆರವು ಅಗತ್ಯವಿದೆ ಎಂಬ ಸಂದೇಶ ಏರ್ ಟ್ರಾಫಿಕ್ ಕಂಟ್ರೋಲ್‌ಗೆ ರವಾನೆಯಾಗುತ್ತದೆ.
ಆದರೆ 7700 ಕೋಡ್ ಮಾತ್ರದಿಂದ ವಿಮಾನದಲ್ಲಿ ಯಾವ ನಿರ್ದಿಷ್ಟ ಸಮಸ್ಯೆ ಎದುರಾಗಿದೆ ಎಂಬುದು ತಿಳಿಯುವುದಿಲ್ಲ. ವಿವಿಧ ರೀತಿಯ ತುರ್ತು ಪರಿಸ್ಥಿತಿಗಳಲ್ಲಿ ಪೈಲಟ್‌ಗಳು ಈ ಕೋಡ್ ಬಳಸಬಹುದು. ಹೀಗಾಗಿ BA295 ವಿಮಾನ 37 ಸಾವಿರ ಅಡಿಯಿಂದ ಕೆಲವೇ ಸಮಯದಲ್ಲಿ 9 ಸಾವಿರ ಅಡಿಗೆ ಇಳಿದಿರುವುದು ಆತಂಕ ಮೂಡಿಸಿದರೂ, ಘಟನೆಯ ನಿಖರ ಕಾರಣ ತಿಳಿಯಲು ಅಧಿಕೃತ ತನಿಖೆಯ ಮಾಹಿತಿ ಹೊರಬರಬೇಕಿದೆ.
ಪ್ರಗತಿವಾಹಿನಿ ಸುದ್ದಿಗಳನ್ನು ನಿಮ್ಮ ಸ್ನೇಹಿತರಿಗೆ, ಬೇರೆ ಗ್ರುಪ್ ಗಳಿಗೆ ಶೇರ್ ಮಾಡಿ
