ಪ್ರಗತಿವಾಹಿನಿ ಸುದ್ದಿ: ಕೆಲ ಎಟಿಎಂ ಗಳಲ್ಲಿ ಹೊಸ ನಿಯಮಗಳು ಜಾರಿಗೆ ಬಂದಿವೆ. ಕೆಲವು ಖಾಸಗಿ ಬ್ಯಾಂಕ್‌ಗಳ ಎಟಿಎಂಗಳಲ್ಲಿ ಬದಲಾವಣೆಗಳು ಗ್ರಾಹಕರಿಗೆ ತೊಂದರೆ ಉಂಟುಮಾಡುತ್ತಿವೆ ಎಂಬ ವರದಿಗಳು ಕೇಳಿಬರುತ್ತಿವೆ.
ತುರ್ತಾಗಿ ಕೈಯಲ್ಲಿ ₹5,000 ಹಣ ಬೇಕಾಗಿದೆ. ಹತ್ತಿರದ ಎಟಿಎಂಗೆ ಹೋಗಿ ಕಾರ್ಡ್ ಹಾಕಿ ಹಣ ಹಿಂಪಡೆಯಲು ಮುಂದಾಗುತ್ತೀರಿ. ಆದರೆ ಅಲ್ಲಿ ನಿಮಗೆ ಕಾಣಿಸುವುದು ₹500, ₹4,000, ₹6,500 ಎಂಬ ಮೂರು ಆಯ್ಕೆಗಳು ಮಾತ್ರ! ನಿಮಗೆ ಬೇಕಾದ ₹5,000 ಮೊತ್ತವನ್ನು ನಮೂದಿಸುವ ಅವಕಾಶವೇ ಇಲ್ಲದಿದ್ದರೆ ಹೇಗಿರುತ್ತದೆ? ಅಷ್ಟೇ ಅಲ್ಲ, ನಿಮ್ಮ ಹಣ ಪಡೆಯಲು ಎರಡು ಬಾರಿ ಎಟಿಎಂ ವಹಿವಾಟು ನಡೆಸಬೇಕಾದ ಪರಿಸ್ಥಿತಿ ಬಂದರೆ? ಏನು ಮಾಡಬೇಕು? ಎಂಬ ಪ್ರಶ್ನೆ ಮೂಡುತ್ತಿದೆ.
ಕಾರಣ ಕೆಲವು ಖಾಸಗಿ ಬ್ಯಾಂಕ್‌ಗಳ ಎಟಿಎಂಗಳಲ್ಲಿ ಇಂತಹ ಬದಲಾವಣೆಗಳು ಗ್ರಾಹಕರಿಗೆ ತೊಂದರೆ ಉಂಟುಮಾಡುತ್ತಿವೆ ಎಂಬ ವರದಿಗಳು ಕೇಳಿಬರುತ್ತಿವೆ. ಎಟಿಎಂನಲ್ಲಿ ಹಣ ಹಿಂಪಡೆಯುವ ವಿಧಾನವೇ ಬದಲಾಗುತ್ತಿದೆಯೇ ಎಂಬ ಪ್ರಶ್ನೆ ಎದುರಾಅಗಿದೆ.
ಸಾಮಾನ್ಯವಾಗಿ ಎಟಿಎಂಗೆ ಹೋದಾಗ ಗ್ರಾಹಕರು ತಮಗೆ ಬೇಕಾದ ಮೊತ್ತವನ್ನು ನಮೂದಿಸಿ ಹಣ ಹಿಂಪಡೆಯುವ ಅವಕಾಶವಿತ್ತು. ₹2,000 ಬೇಕಿದ್ದರೂ, ₹5,000 ಬೇಕಿದ್ದರೂ ಅಥವಾ ₹8,000 ಬೇಕಿದ್ದರೂ ತಮ್ಮ ಅಗತ್ಯಕ್ಕೆ ತಕ್ಕಂತೆ ಹಣ ಪಡೆಯಬಹುದಾಗಿತ್ತು.
ಆದರೆ ಕೆಲವು ಎಟಿಎಂಗಳಲ್ಲಿ ಹೊಸ ಸಾಫ್ಟ್‌ವೇರ್‌ ಅಳವಡಿಕೆಯ ಬಳಿಕ ಹಣ ಹಿಂಪಡೆಯುವ ಆಯ್ಕೆಗಳಲ್ಲಿ ಬದಲಾವಣೆ ಮಾಡಲಾಗಿದೆ ಎನ್ನಲಾಗಿದೆ. ಈಗ ಕೆಲವು ಯಂತ್ರಗಳಲ್ಲಿ ₹500, ₹4,000 ಮತ್ತು ₹6,500 ಎಂಬ ನಿರ್ದಿಷ್ಟ ಮೊತ್ತಗಳ ಆಯ್ಕೆ ಮಾತ್ರ ಕಾಣಿಸುತ್ತಿದೆ ಎಂಬ ಆರೋಪ ಕೇಳಿಬಂದಿದೆ.
ಇದರಿಂದ ಗ್ರಾಹಕರು ತಮಗೆ ಬೇಕಾದ ಮೊತ್ತವನ್ನು ಒಂದೇ ಬಾರಿಗೆ ಪಡೆಯಲು ಸಾಧ್ಯವಾಗದೆ ಪರದಾಡುವಂತಾಗಿದೆ.
ಉದಾಹರಣೆಗೆ, ಒಬ್ಬ ಗ್ರಾಹಕನಿಗೆ ತುರ್ತಾಗಿ ₹5,000 ಹಣ ಬೇಕಿದೆ ಎಂದುಕೊಳ್ಳಿ. ಎಟಿಎಂನಲ್ಲಿ ₹4,000 ಆಯ್ಕೆ ಮಾಡಿಕೊಂಡರೆ ಇನ್ನೂ ₹1,000 ಕಡಿಮೆಯಾಗುತ್ತದೆ. ಉಳಿದ ಹಣಕ್ಕಾಗಿ ಮತ್ತೊಮ್ಮೆ ವಹಿವಾಟು ನಡೆಸಬೇಕಾದ ಪರಿಸ್ಥಿತಿ ಎದುರಾಗಬಹುದು.
ಇಲ್ಲಿ ಗ್ರಾಹಕರಿಗೆ ಎದುರಾಗುವ ಮತ್ತೊಂದು ಆತಂಕವೆಂದರೆ ಉಚಿತ ಎಟಿಎಂ ವಹಿವಾಟುಗಳ ಮಿತಿ. ಒಂದೇ ಬಾರಿ ಪಡೆಯಬಹುದಾದ ಹಣವನ್ನು ಎರಡು ಬಾರಿ ವಹಿವಾಟು ನಡೆಸಿ ಪಡೆಯಬೇಕಾದರೆ ಉಚಿತ ವಹಿವಾಟುಗಳ ಸಂಖ್ಯೆ ಬೇಗನೆ ಮುಗಿಯುವ ಸಾಧ್ಯತೆ ಇದೆ.
ಸಾಮಾನ್ಯವಾಗಿ ಉಚಿತ ಎಟಿಎಂ ವಹಿವಾಟುಗಳ ಮಿತಿ ಹೀಗಿರುತ್ತದೆ: ಸ್ವಂತ ಬ್ಯಾಂಕ್‌ನ ಎಟಿಎಂಗಳಲ್ಲಿ ಸಾಮಾನ್ಯವಾಗಿ ತಿಂಗಳಿಗೆ 5 ಉಚಿತ ವಹಿವಾಟುಗಳು. ಇತರ ಬ್ಯಾಂಕ್‌ಗಳ ಎಟಿಎಂಗಳಲ್ಲಿ ಮೆಟ್ರೋ ನಗರಗಳಲ್ಲಿ 3 ಮತ್ತು ಇತರ ನಗರಗಳಲ್ಲಿ 5 ಉಚಿತ ವಹಿವಾಟುಗಳು.
ನಿಗದಿತ ಉಚಿತ ಮಿತಿಯನ್ನು ಮೀರಿದರೆ ಬ್ಯಾಂಕ್‌ಗಳು ಶುಲ್ಕ ವಿಧಿಸಬಹುದು. ಆದರೆ ಅನ್ವಯಿಸುವ ನಿಯಮಗಳು, ಶುಲ್ಕಗಳು ಮತ್ತು ಮಿತಿಗಳು ಬ್ಯಾಂಕ್ ಹಾಗೂ ಖಾತೆಯ ಪ್ರಕಾರ ಬದಲಾಗಬಹುದು.
ಎಟಿಎಂನಲ್ಲಿ ಕಾಣಿಸುತ್ತಿರುವ ಹೊಸ ಆಯ್ಕೆಗಳಿಂದ ತೊಂದರೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಕೆಲವು ಗ್ರಾಹಕರು ಬ್ಯಾಂಕ್ ಅಧಿಕಾರಿಗಳನ್ನು ಪ್ರಶ್ನಿಸುತ್ತಿದ್ದಾರೆ ಎನ್ನಲಾಗಿದೆ. ಆದರೆ ಈ ಬದಲಾವಣೆಗಳ ಬಗ್ಗೆ ತಮಗೆ ಮಾಹಿತಿ ಇಲ್ಲ ಎಂದು ಕೆಲವು ಬ್ಯಾಂಕ್ ಮ್ಯಾನೇಜರ್‌ಗಳು ಹೇಳುತ್ತಿದ್ದಾರೆ ಎಂಬ ಆರೋಪವೂ ವರದಿಯಲ್ಲಿದೆ.
ಇನ್ನು ಕೆಲವರು ಈ ವಿಚಾರವನ್ನು ಮೇಲಧಿಕಾರಿಗಳ ಗಮನಕ್ಕೆ ತರುವುದಾಗಿ ತಿಳಿಸಿದ್ದಾರೆ ಎನ್ನಲಾಗಿದೆ.
ನಿಮ್ಮ ಎಟಿಎಂನಲ್ಲಿಯೂ ನಿರ್ದಿಷ್ಟ ಮೊತ್ತಗಳ ಆಯ್ಕೆ ಮಾತ್ರ ಕಾಣಿಸುತ್ತಿದ್ದರೆ, ಬೇರೆ ಮೊತ್ತವನ್ನು ನಮೂದಿಸುವ ಆಯ್ಕೆ ಇದೆಯೇ ಎಂದು ಪರಿಶೀಲಿಸಿ. ವಹಿವಾಟು ನಡೆಸುವ ಮೊದಲು ಬ್ಯಾಂಕ್‌ನ ಅಧಿಕೃತ ಗ್ರಾಹಕ ಸೇವಾ ಕೇಂದ್ರದ ಮೂಲಕ ಶುಲ್ಕ ಮತ್ತು ಉಚಿತ ವಹಿವಾಟುಗಳ ಮಿತಿಯನ್ನು ತಿಳಿದುಕೊಳ್ಳಿ.
