*13,629 ಅಡಿ ಎತ್ತರದಲ್ಲಿ ಇಳಿದ ಬೃಹತ್ ವಿಮಾನ!*: *ಭಾರತೀಯ ವಾಯುಪಡೆಯಿಂದ ಐತಿಹಾಸಿಕ ಸಾಧನೆ*
ಪ್ರಗತಿವಾಹಿನಿ ಸುದ್ದಿ: ಭಾರತೀಯ ವಾಯುಪಡೆ ಮತ್ತೊಂದು ಐತಿಹಾಸಿಕ ಸಾಧನೆ ಮಾಡಿದೆ. ಸಾಮಾನ್ಯ ವಿಮಾನಗಳ ಕಾರ್ಯಾಚರಣೆಯೇ ಸವಾಲಾಗಿರುವ ಅತಿ ಎತ್ತರದ ಪ್ರದೇಶದಲ್ಲಿ ಭಾರೀ ಸರಕು ಸಾಗಣೆ ವಿಮಾನವನ್ನು ಯಶಸ್ವಿಯಾಗಿ ಇಳಿಸಲಾಗಿದೆ. ಐಎಎಫ್‌ನ IL-76MD ವಿಮಾನವು ಬರೋಬ್ಬರಿ 13,629 ಅಡಿ ಎತ್ತರದಲ್ಲಿ ಲ್ಯಾಂಡಿಂಗ್ ಮಾಡುವ ಮೂಲಕ ಜಾಗತಿಕ ಮಟ್ಟದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ. ಈ ಸಾಧನೆ ವಿಮಾನದ ಸಾಮರ್ಥ್ಯ ಮಾತ್ರವಲ್ಲ, ವಾಯುಪಡೆಯ ಸಿಬ್ಬಂದಿಯ ಕೌಶಲ ಮತ್ತು ನಿಖರತೆಯನ್ನೂ ಪ್ರದರ್ಶಿಸಿದೆ.
ಭಾರತೀಯ ವಾಯುಪಡೆಯೇ ಈ ಮಹತ್ವದ ಸಾಧನೆಯನ್ನು ತನ್ನ ಅಧಿಕೃತ ಎಕ್ಸ್ ಖಾತೆಯಲ್ಲಿ ಪ್ರಕಟಿಸಿದೆ. ಲಡಾಖ್‌ನ ನ್ಯೋಮಾ ವಾಯುನೆಲೆಯಲ್ಲಿ ವಿಮಾನ ಇಳಿಯುತ್ತಿರುವ ಛಾಯಾಚಿತ್ರಗಳು ಮತ್ತು ವಿಡಿಯೋಗಳನ್ನು ಹಂಚಿಕೊಂಡಿರುವ ವಾಯುಪಡೆ, ಜಗತ್ತಿನಲ್ಲಿ IL-76MD ವಿಮಾನವೊಂದು ಇಳಿದಿರುವ ಅತ್ಯಂತ ಎತ್ತರದ ಸ್ಥಳ ಇದಾಗಿದೆ ಎಂದು ತಿಳಿಸಿದೆ.
ಈ ಸಾಧನೆಯನ್ನು ವಾಯುಯಾನ ಇತಿಹಾಸದಲ್ಲಿ ಹೊಸ ಎತ್ತರ ಎಂದು ಬಣ್ಣಿಸಿರುವ ವಾಯುಪಡೆ, ಕಾರ್ಯಾಚರಣೆಯಲ್ಲಿ ಭಾಗಿಯಾದ ಸಿಬ್ಬಂದಿಯ ಕೌಶಲ, ನಿಖರತೆ ಮತ್ತು ವೃತ್ತಿಪರತೆಯನ್ನು ಶ್ಲಾಘಿಸಿದೆ. ಇಂತಹ ಕಾರ್ಯಾಚರಣೆಗಳು ಭಾರತದ ಕಾರ್ಯತಂತ್ರದ ವೈಮಾನಿಕ ಸಾಗಣೆ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸಲಿವೆ ಎಂದು ತಿಳಿಸಿದೆ.
ಪೂರ್ವ ಲಡಾಖ್‌ನಲ್ಲಿರುವ ನ್ಯೋಮಾ, ಚೀನಾದೊಂದಿಗಿನ ವಾಸ್ತವಿಕ ನಿಯಂತ್ರಣ ರೇಖೆ ಅಂದರೆ ಎಲ್‌ಎಸಿಗೆ ಸಮೀಪದಲ್ಲಿದೆ. ಹೀಗಾಗಿ ಆಯಕಟ್ಟಿನ ದೃಷ್ಟಿಯಿಂದ ಈ ವಾಯುನೆಲೆ ಅತ್ಯಂತ ಮಹತ್ವದ್ದಾಗಿದೆ. ಸಮುದ್ರ ಮಟ್ಟದಿಂದ ಅತಿ ಎತ್ತರದಲ್ಲಿರುವ ಕಾರಣ ಇಲ್ಲಿ ವಿಮಾನ ಇಳಿಸುವುದು ಮತ್ತು ಹಾರಾಟ ನಡೆಸುವುದು ದೊಡ್ಡ ಸವಾಲು. ಇದಕ್ಕೆ ಅತ್ಯಂತ ಎಚ್ಚರಿಕೆಯ ಯೋಜನೆ ಮತ್ತು ನಿಖರವಾದ ಕಾರ್ಯಾಚರಣೆ ಅಗತ್ಯ.
ಇನ್ನು IL-76MD ರಷ್ಯಾ ಮೂಲದ ನಾಲ್ಕು ಎಂಜಿನ್‌ಗಳನ್ನು ಹೊಂದಿರುವ ಭಾರೀ ಸಾರಿಗೆ ವಿಮಾನವಾಗಿದೆ. ಸೈನಿಕರು, ಸೇನಾ ಉಪಕರಣಗಳು ಮತ್ತು ಅಗತ್ಯ ಸರಕುಗಳನ್ನು ಸಾಗಿಸಲು ಇದನ್ನು ಬಳಸಲಾಗುತ್ತದೆ. ದೇಶದ ದೂರದ ಹಾಗೂ ಆಯಕಟ್ಟಿನ ಪ್ರದೇಶಗಳಿಗೆ ಸಿಬ್ಬಂದಿ ಮತ್ತು ಸಾಮಗ್ರಿಗಳನ್ನು ತಲುಪಿಸುವಲ್ಲಿ ಈ ವಿಮಾನ ಪ್ರಮುಖ ಪಾತ್ರ ವಹಿಸುತ್ತದೆ.
