*AITM–ದಕ್ಷಿಣ ಕೊರಿಯಾದ ಡಾಂಗ್ಗುಕ್ ವಿಶ್ವವಿದ್ಯಾಲಯದ ನಡುವೆ ಒಪ್ಪಂದ*
ಪ್ರಗತಿವಾಹಿನಿ ಸುದ್ದಿ: ಬೆಳಗಾವಿ: ಅಂತರರಾಷ್ಟ್ರೀಯ ಶೈಕ್ಷಣಿಕ ಸಹಯೋಗವನ್ನು ಬಲಪಡಿಸುವ ನಿಟ್ಟಿನಲ್ಲಿ ಬೆಳಗಾವಿಯ ಅಂಗಡಿ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಅಂಡ್ ಮ್ಯಾನೇಜ್ಮೆಂಟ್ (AITM) ಮಹತ್ವದ ಹೆಜ್ಜೆ ಇಟ್ಟಿದೆ. ದಕ್ಷಿಣ ಕೊರಿಯಾದ ಸಿಯೋಲ್ನ ಡಾಂಗ್ಗುಕ್ ವಿಶ್ವವಿದ್ಯಾಲಯದೊಂದಿಗೆ AITM ಆಗಸ್ಟ್ 13ರಂದು ಚೆನ್ನೈನಲ್ಲಿ ತಿಳುವಳಿಕಾ ಒಡಂಬಡಿಕೆಗೆ (MoU) ಸಹಿ ಹಾಕಿದೆ.
ಈ ಒಡಂಬಡಿಕೆಯ ಮೂಲಕ AITM ವಿದ್ಯಾರ್ಥಿಗಳು ಮತ್ತು ಬೋಧಕ ವರ್ಗಕ್ಕೆ ಹಲವು ಅಂತಾರಾಷ್ಟ್ರೀಯ ಶೈಕ್ಷಣಿಕ ಅವಕಾಶಗಳು ಲಭ್ಯವಾಗಲಿವೆ. ಅಂತರ-ಸಾಂಸ್ಕೃತಿಕ ಶೈಕ್ಷಣಿಕ ವಿನಿಮಯ, ವಿದ್ಯಾರ್ಥಿ ಹಾಗೂ ಬೋಧಕರ ವಿನಿಮಯ ಕಾರ್ಯಕ್ರಮಗಳು, ಜಂಟಿ ಸಂಶೋಧನಾ ಯೋಜನೆಗಳು, ಜ್ಞಾನ ಹಂಚಿಕೆ, ನಾವೀನ್ಯತೆ ಮತ್ತು ಅಂತಾರಾಷ್ಟ್ರೀಯ ಇಂಟರ್ನ್ಶಿಪ್ಗಳಿಗೆ ಸಹಕಾರ ದೊರೆಯಲಿದೆ.
ಜಾಗತಿಕ ಶೈಕ್ಷಣಿಕ ಪದ್ಧತಿಗಳು ಹಾಗೂ ಮುಂದುವರಿದ ಸಂಶೋಧನಾ ಕ್ಷೇತ್ರಗಳೊಂದಿಗೆ ವಿದ್ಯಾರ್ಥಿಗಳು ಮತ್ತು ಪ್ರಾಧ್ಯಾಪಕರು ನೇರವಾಗಿ ಸಂಪರ್ಕ ಸಾಧಿಸಲು ಈ ಸಹಯೋಗ ನೆರವಾಗಲಿದೆ. ಉದಯೋನ್ಮುಖ ತಂತ್ರಜ್ಞಾನಗಳು, ಆಧುನಿಕ ಸಂಶೋಧನೆ ಮತ್ತು ವಿಶ್ವದರ್ಜೆಯ ಶೈಕ್ಷಣಿಕ ವಾತಾವರಣದ ಅನುಭವ ಪಡೆಯಲು ಇದು ವೇದಿಕೆ ಒದಗಿಸಲಿದೆ.
ಜಂಟಿ ಸಂಶೋಧನೆ ಮತ್ತು ಯೋಜನೆಗಳ ಮೂಲಕ ವಿದ್ಯಾರ್ಥಿಗಳು ವೇಗವಾಗಿ ಬೆಳೆಯುತ್ತಿರುವ ತಂತ್ರಜ್ಞಾನ ಕ್ಷೇತ್ರಕ್ಕೆ ಅಗತ್ಯವಿರುವ ಕೌಶಲ್ಯಗಳನ್ನು ಬೆಳೆಸಿಕೊಳ್ಳಲು ಸಹಕಾರಿಯಾಗಲಿದೆ. ಅಂತಾರಾಷ್ಟ್ರೀಯ ಮಟ್ಟದ ಕಲಿಕಾ ಅನುಭವದೊಂದಿಗೆ ನಾವೀನ್ಯತೆ ಮತ್ತು ಸಂಶೋಧನಾ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಲು ಈ ಒಡಂಬಡಿಕೆ ಅವಕಾಶ ಕಲ್ಪಿಸಲಿದೆ.
ಒಡಂಬಡಿಕೆ ಸಹಿ ಸಮಾರಂಭದಲ್ಲಿ ಡಾಂಗ್ಗುಕ್ ವಿಶ್ವವಿದ್ಯಾಲಯದ ಫ್ಯೂಚರ್ ಟೆಕ್ನಾಲಜಿ ಸಂಸ್ಥೆಯ ನಿರ್ದೇಶಕರು ಹಾಗೂ ಕ್ವಾಂಟಮ್-ಫಂಕ್ಷನಲ್ ಸೆಮಿಕಂಡಕ್ಟರ್ ರಿಸರ್ಚ್ ಸೆಂಟರ್ನ ನಿರ್ದೇಶಕರಾದ ಡಾ. ಸೆಜೂನ್ ಲೀ, ಕ್ವಾಂಟಮ್-ಫಂಕ್ಷನಲ್ ಸೆಮಿಕಂಡಕ್ಟರ್ ರಿಸರ್ಚ್ ಸೆಂಟರ್ನ ಡಾ. ಯಂಗ್ಮಿನ್ ಲೀ ಹಾಗೂ ಡಾ. ಶಂಕರ್ ಶೇಖರ್ ಉಪಸ್ಥಿತರಿದ್ದರು.
AITM ಪರವಾಗಿ ಪ್ರಾಂಶುಪಾಲರು ಹಾಗೂ ನಿರ್ದೇಶಕರಾದ ಡಾ. ಆನಂದ್ ಬಿ. ದೇಶಪಾಂಡೆ ಮತ್ತು ತರಬೇತಿ ಹಾಗೂ ಉದ್ಯೋಗ ನಿಯೋಜನಾ ಅಧಿಕಾರಿ (TPO) ಪ್ರೊ. ವಿಶಾಲಕೀರ್ತಿ ಪಾಟೀಲ ಭಾಗವಹಿಸಿದ್ದರು.
ಈ ಅಂತಾರಾಷ್ಟ್ರೀಯ ಸಹಯೋಗದ ಸಂಪೂರ್ಣ ಪ್ರಕ್ರಿಯೆಯನ್ನು ಸಂಯೋಜಿಸುವಲ್ಲಿ AITMನ ರೋಬೋಟಿಕ್ಸ್ ಮತ್ತು ಆಟೊಮೇಷನ್ ವಿಭಾಗದ ಮುಖ್ಯಸ್ಥರಾದ ಡಾ. ಪೂಜಾ ವಿ. ಅನಗೋಳ್ಕರ್ ಅವರ ಪಾತ್ರವೂ ಮಹತ್ವದ್ದಾಗಿದೆ.
ಡಾಂಗ್ಗುಕ್ ವಿಶ್ವವಿದ್ಯಾಲಯದೊಂದಿಗೆ ಅರ್ಥಪೂರ್ಣ ಹಾಗೂ ದೀರ್ಘಕಾಲೀನ ಸಹಭಾಗಿತ್ವವನ್ನು ಬೆಳೆಸುವ ಮೂಲಕ ಜಾಗತಿಕ ಕಲಿಕೆ, ಸಂಶೋಧನೆ, ನಾವೀನ್ಯತೆ ಮತ್ತು ಶೈಕ್ಷಣಿಕ ಉತ್ಕೃಷ್ಟತೆಯತ್ತ AITM ತನ್ನ ಬದ್ಧತೆಯನ್ನು ಮತ್ತಷ್ಟು ಬಲಪಡಿಸಿದೆ.
